Elvin Məmmədov: İsti hava Qarabağ üçün üstünlük sayıla bilməz
"Qarabağ"ın yarımmüdafiəçisi Elvin Məmmədov UEFA Çempionlar Liqasının üçüncü təsnifat mərhələsi çərçivəsində Şotlandiyanın "Seltik" klubuna qarşı keçirəcəkləri cavab matçı öncəsi azerisport.az saytının suallarını cavablandırıb:
- "Qarabağ" cavab oyununa hazırdır?
- Biz oyuna tam hazırıq. Allaha şükür ki, əhval-ruhiyyə də yaxşıdır. Mehriban, yaxşı kollektivimiz var.
- "Seltik"i keçmək üçün nə etmək lazımdır?
- Səbrli davranmalıyıq. Müdafiədə diqqətli oynamaqla yanaşı ələ düşən qol şanslarından da maksimum yararlanmalıyıq.
- "Qarabağ"a qol lazımdır. Bu isə ilk dəqiqələrdən hücuma atılacağınızdan xəbər verir. Yoxsa, rəqibin nə vaxt səhv edəcəyini gözləyəcəksiniz?
- Biz baş məşqçinin müəyyənləşdirəcəyi taktika ilə oynayacağıq.
- "Seltik"ə iki-üç qol vurmaq realdır?
- Futbolda hər şey mümkündür. Niyə də bunu bacarmayaq? "Qarabağ" adlı-sanlı rəqiblərə qarşı az oynamayıb, onlara qol da vurub.
- Matçın keçiriləcəyi Tofiq Bəhramov adın Respublika stadionunun qazonu sizi narahat etmir?
- Deyilənə görə, oyuna qədər hər şey qaydasına düşəcək. Ümid edirik ki, qazonun vəziyyəti bizim daha yaxşı oynamağımıza problem yaratmayacaq.
- "Qarabağ" "Seltik" səddini keçə bilməsə, azarkeşlər çox məyus olacaq...
- Azarkeşlərin bizi necə dəstəklədiyini bilirik. Allah eləsin ki, xalqın dəstəyi ilə növbəti mərhələyə keçək. Gəlin pozitivi düşünək. Azarkeşlərin dəstəyinə çox ehtiyacımız var.
- Cavid Tağıyev Bakıdakı "Rudar"a qarşı oyunda, eləcə də "Seltik"lə görüşdə qol şanslarından yararlana bilmədi. Baş məşqçinin onun əvəzində bu dəfə daha təcrübəli olduğunuz üçün sizə güvənəcəyini demək olar?
- Cavid çox yaxşı futbolçudur. Onun yaxşı gələcəyi var. Mənim və ya onun oynamasının fərqi yoxdur. Əsas qələbədir.
- "Seltik"in futbolçuları Bakıdakı istidən narahatdırlar. Bunu özünüz üçün üstünlük sayırsınız?
- Düşünmürəm ki, bu, bizim üçün üstünlükdür. Hava amili heç nəyi dəyişmir. Havanın temperaturu hər iki komanda üçün eyni olacaq.
- "Seltik"in futbolçularının açıqlamalarından hiss olunur ki, "Qarabağ"dan çəkinirlər...
- Hə, mətbuatı oxuyuram. "Seltik" hər zaman bizə hörmətlə yanaşıb.
