Aftandil Hacıyev: Seltiklə cavab matçı Qarabağın diqtəsi ilə keçəcək
"Qarabağ"ın əvəzedici komandasının baş məşqçisi Aftandil Hacıyevin azerisport.az saytına müsahibəsi
- "Qarabağ"ın əsas komandası ÇL-in üçüncü təsnifat mərhələsi çərçivəsində Şotlandiya "Seltik"inə səfərdə minimal hesabla uduzdu. Komanda ümidlərinizi doğrultdu?
- Hər şeydən öncə bu oyunu canlı efirdən izləyə bilmədiyimizə görə məyusluğumu bildirmək istəyərdim. "Seltik Park"da meydan sahiblərinə böyük dəstək olsa da, "Qarabağ" güclü çıxış etdi. Favorit "Seltik" olsa da, Ağdam klubu onlarla yaxşı mübarizə apardı. 0:1 hesablı məğlubiyyətə baxmayaraq, əls mübarizə hələ qarşıdadır. Fikrimcə, "Seltik" keçiləsi komandadır. Sadəcə, standart vəziyyətlər zamanı diqqətli olmaq lazımdır.
- Yəqin ki, ilk matçın statistikasına baxmısınız. Üstünlük "Qarabağ"da olsa da, son nöqtəni qoya bilmədi...
- Əlbəttə, nəticə daha vacibdir. Komanda bütün oyunu yaxşı oynayıb, 90 dəqiqə ərzində qol vura bilmirsə, oyundan sonra heç kim yaxşı oyundan danışmır. Hər kəs nəticəni əsas götürür. Amma ilk oyundakı üstünlük ondan xəbər verir ki, Bakıdakı görüş daha maraqlı olacaq. Cavab matçı bizim diqtəmiz altında keçəcək. Bütövlükdə, "Qarabağ" "Seltik"dən daha yaxşı oynayır. Komandamız evdə növbəti mərhələyə vəsiqə qazandıracaq nəticəyə nail ola bilər.
- Sizcə, minimal hesablı məğlubiyyət "Qarabağ"a problem yaratmayacaq?
- Mən səfərdəki 0:0 və 0:1 arasında heç bir fərq görmürəm. Niyə? İstənilən halda ev oyununda bir qol vurmaq lazımdır. Mütləq hücum futbolu sərgiləməliyik. "Qarabağ"ın oyunu da ümidli olmağa əsas verir.
- Bakıda qələbə qazanmaq üçün nə etmək lazımdır?
- "Qarabağ" daha çox hücum etməlidir. Şotlandlar artıq komandamızı tanıyırlar, "Qarabağ"ın oyunlarını analiz ediblər. İnanıram ki, Qurban Qurbanov yeni hücum variantları tapacaq. Futbolçular da xüsusi ev tapşırıqları üzərində işləməlidirlər. Xüsusilə də standart vəziyyətlər zamanı.
- "Seltik"in hücum xətti çox güclüdür. Onlar az qala hər oyunda qol vururlar və Bakıda da fərqlənə bilərlər...
- Fikrimcə, "Qarabağ" qalib gələcək. Hərdən qələbə qazanırsan, növbəti mərhələyə çıxa bilmirsən. Məsələn, 2:1 hesablı qələbə "Qarabağ" üçün yetərli olmayacaq. Amma mənə elə gəlir ki, komandamız müdafiədə də yaxşı oynayıb, qol buraxmadan qalib gələcək.
