Səlahət Ağayev: Atletikə 3 qol vurub mərhələ keçəcəyimizi desəm, düz olmaz
"İnter"in kapitanı Səlahət Ağayev Avropa Liqasının üçüncü təsnifat mərhələsi çərçivəsində İspaniyanın "Atletik" klubuna qarşı keçirdikləri ilk oyundan (0:2) sonra azerisport.az saytının suallarına cavab verib.
- "Atletik"lə oyun haqda fikirilərini bilmək istərdik. "İnter"in oyunundan razı qaldınız?
- Fikrimcə, komandamız sona qədər mübarizə apardı. Səhvlərimiz oldu. Bununla belə Bilbao təmsilçisinə məğlubiyyətimizi təbii qəbul edirəm. Rəqib çox güclü idi. Üstəlik, arenada azarkeşlərin dəstəyi onlara kömək oldu. Bu gün "Atletik" qitənin ən güclü klubları sırasındadır.
- Yəqin razılaşarsan, qapıçı kimi sənin işin çox oldu?
- Qapıçı çalışmalıdır ki, bütün topları qaytarsın. 90 dəqiqə ərzində işimlə məşğul olmuşam. Bütün futbolçularımız yaxşı nəticə üçün mübarizə apardı. Bir neçə epizodda sürətli hücumların qarşısını ala bilmədik və qolla nəticələndi. Belə oyunlardan çox şey öyrənmək olar. Ardıcıl iki mərhələ keçəndən sonra məhz "Atletik"lə düşməyimiz yaxşı oldu.
- "İnter" rəqibi təəccübləndirə bildi?
- İspanlar bizdən sona qədər mübarizə gözləmirdi. İmkan olduqca hücuma keçməyə çalışırdıq. Bizim heyətdə əksər futbolçular ilk dəfə belə stadionda meydana çıxdı. Mən özüm də ilk dəfə belə gözəl arenada oynadım. Azarkeşlərin rəqibə dəstəyi xüsusi ab-hava yaratdı. Karyeramda klublar arasında ən güclü rəqib məhz "Atletik"dir. Heyətdə çox yaxşı futbolçuları var.
- "Atletik" duelin taleyini həll etdi, yoxsa "İnter" cavab matçında dönüş yarada bilər?
- Desəm ki, Bakıda 3 qol vurub mərhələ keçəcəyik, düz olmaz. Bu gün Bilbao təmsilçisi cütün favoritidir. Bizim aramızda səviyyə fərqi çox yüksəkdir. Ona görə mübarizə aparmağımız real deyil. Çalışmalıyıq, layiqli oynayaq. Avropa Liqasıyla layiqincə vidalaşaq. Futbolda hər şey olur, amma bu dəfə səviyyə fərqi çox böyükdür.
- "Atletik"lə "İnter" arasında fərq ən çox nədən ibarətdir?
- Maliyyə fərqini nəzərdə tutmuram. Adicə İspaniya La Liqasıyla Azərbaycan Premyer Liqasını götürək. Bilbao təmsilçisi bu stadionda "Real" və "Barselona" kimi komandalara qaşı çıxış edir. Biz isə tam fərqli oyunlarda mübarizə aparırıq. Klubun tarixi bütün suallara cavab verir.
- Cavab matçında azarkeşləri nə gözləyir?
- Azarkeşlərimizə təşəkkür edirəm. Bizi doğma meydanda sona qədər dəstəkləyirlər. "Atletik"lə oyunda özümüzü göstərməyə çalışacağıq. Bakıdakı mübarizə də asan olmayacaq. Biz çalışacağıq müəyyən mənada bizi dəstəkləyən insanları razı salaq.
