Həşimov: Seltik Zalsburqdan güclü komanda deyil

"Qarabağ"ın sabiq futbolçusu Zaur Həşimov Ağdam klubunun UEFA Çempionlar Liqasının üçüncü təsnifat mərhələsi çərçivəsində Şotlandiya "Seltik"inə qarşı ilk oyunda 0:1 hesablı məğlubiyyətini şərh edib. Azerisport.az saytına açıqlamasında o, bunları söyləyib:

"Ümid edirəm ki, "Qarabağ" "Seltik" səddini keçəcək. Amma bir şərtlə ki, Bakıdakı oyunda qol buraxmasın. Britaniyalılar "ikinci mərtəbə"dəki oyunlarına görə bütün dünyada fərqlənirlər. Bu üzdən cavab qarşılaşmasında yenidən standart vəziyyətlər zamanı qol buraxmamaq vacibdir. "Qarabağ"ın səfərdən heç-heçə ilə dönməsinə də bu mane oldu. Künc zərbəsi zamanı komandamız qol buraxdı. Mənə elə gəlir ki, "Seltik" "Qarabağ"ın vaxtilə qarşılaşdığı "Zalsburq"dan güclü komanda deyil. Ona da əminəm ki, "Qarabağ" Bakıda səfərdəki ilə müqayisədə daha yaxşı futbol sərgiləyəcək. Ev oyununda ajiotaj da böyük olacaq. Eyni zamanda komanda üzərində azarkeşlərin, jurnalistlərin təzyiqi də qaçılmaz olacaq. "Seltik" isə cavab görüşündə əks-hücumlara və standart vəziyyətlərə bel bağlayacaq. Ona görə bu məqamlara xüsusi diqqət ayırmaq lazımdır. Çox istərdim ki, bir həftə sonra "Qarabağ"ın ÇL-dəki növbəti rəqibindən danışaq. Məşqçilər korpusu və futbolçular bizi sevindirməyə çalışacaqlar".