Elnur Abdullayev: Atletik ilə heç-heçə əla nəticə olardı
"İnter"in yarımmüdafiəçisi Elnur Abdullayev Avropa Liqasının üçüncü təsnifat mərhələsi çərçivəsində İspaniyanın "Atletik" klubuna qarşı keçirəcəkləri ilk oyun öncəsi azerisport.az saytının suallarını cavablandırıb.
- "Atletik"lə ilk oyunda sizdən nə gözləyək?
- Bizi çətin oyun gözləyir. Bunu "İnter"in hər bir futbolçusu dərk edir. İlk oyuna ciddi hazırlaşmışıq.
- Sizə elə gəlmir ki, Azərbaycan təmsilçiləri arasında ən çətin rəqib məhz sizə qismət olub?
- Elədir ki, var. Mən hətta deyərdim ki, Azərbaycan futbolu tarixində avrokuboklarda qarşılaşdığımız ən güclü rəqibdir. Bizi həm ağır, həm də maraqlı oyun gözləyir.
- "İnter" "Atletik"dən çəkinmir?
- Xeyr. Amma rəqib çox təhlükəli komandadır. Bunu danmaq olmaz. "Atletik" öz oyun üslubu və səviyyəsinə görə La Liqanın fərqlənən klublarındandır. Ona görə də onlara qarşı 100 yox, 200 faiz güc qoymaq lazımdır.
- "İnter"in Bilbaodan müsbət nəticə ilə qayıtması nə dərəcədə inandırıcıdır?
- Bu, futboldur. Burada hər şey mümkündür. Ümid edirəm ki, komandamız evə sərfəli nəticə ilə qayıda biləcək. Allah eləsin ki, buna nail olaq. Çox məsuliyyətli oyundur, bunu hamımız yaxşı başa düşürük.
- Şəxsən siz hansı nəticəyə ümid edirsiniz?
- Mənə elə gəlir ki, heç-heçə əla nəticə olardı.
- Sizə elə gəlmir ki, bu oyundan sürpriz gözləmək sadəlöhvlükdür?
- Futbolda sürprizlər həmişə olur. Həyatda hər şey mümkündür. Allah eləsin ki, "İnter"in buna gücü çatsın.
- "İnter" artıq maksimum vəzifənin öhdəsindən gəlib, ya Avroliqanın qrup mərhələsinə düşmək istəyirsiniz?
- Komandanın cəmi bir araya toplanıb, iki mərhələ keçməsinin özü artıq uğurdur. Amma biz daha yaxşı nəticələrə layiqik və uğurlarımızın davamını gətirmək istəyirik.
