Qarabağın Seltiklə cavab matçı Bakı Olimpiya Stadionunda keçirilə bilər

Azərbaycan çempionu "Qarabağ"ın azarkeşlərindən biri AFFA prezidenti Rövnəq Abdullayevə açıq məktub yazıb. Azerisport.az xəbər verir ki, o, federasiya rəhbərliyindən Ağdam klubunun UEFA Çempionlar Liqasının üçüncü təsnifat mərhələsi çərçivəsində Şotlandiya "Seltik"inə qarşı cavab oyununun Tofiq Bəhramov adına respublika stadionundan Bakı Olimpiya Stadionuna keçirilməsini xahiş edib.

Qeyd edək ki, Bakı Olimpiya Stadionu mərkəzi arena ilə müqayisədə ikiqat artıq - 60 mindən çox azarkeş tutumuna malikdir. "Qarabağ" fanatı da komandanın "Seltik"lə cavab matçına marağın daha böyük olmasını nəzərə alaraq, matçın yerinin dəyişdirilməsini istəyib.

Xatırladaq ki, "Qarabağ" "Seltik"lə ötün gün keçirilən ilk oyunda 0:1 hesablı məğlubiyyətlə üzləşib. Cavab qarşılaşmasında isə komandamız mərhələ keçmək üçün 2 top fərqi ilə qələbə qazanmalıdır.

Sonda onu da vurğulayaq ki, "Qarabağ" "Tofiq Bəhramov"la yanaşı ikinci arena kimi "Bakcell Arena"nı sifariş edib. Bu üzdən də UEFA matçın keçirilmə yerini dəyişməyə bilər. Lakin işə AFFA rəhbərliyi qarışacağı halda hansısa nəticənin əldə olunması istisna deyil.

"Qarabağ"la "Seltik" arasındakı cavab matçı avqustun 5-də keçiriləcək və saat 21:30-da start götürəcək.