Rauf Əliyev: Bir mərhələ keçəcəyimizə inanmırdıq, indi pley-off haqda düşünürük
"İnter"in futbolçusu Rauf Əliyev Bilbaoda keçirilən ilk məşqdən sonra azerisport.az-ın suallarına cavab verib.
- "İnter" üçüncü mərhələdəki oyuna hazırlaşır. "Atletik" haqda fikirlərin necədir?
- Qitənin güclü klublarından birinə qarşı oynayacayıq. Sözsüz onlar favoritdir. "Atletik" üçün bizmlə matç ilk rəsmi oyun olacaq. Onlar çalışacaqlar qələbə qazansınlar. Bununla belə "İnter" bütün gücünü göstərmək niyyətindədir. Artıq bu mərhələdə itirəcəyimiz elə bir şey yoxdur.
- Cari mövsüm "İnter" tarixində ilk dəfə iki mərhələ keçdi. Bu maksimumdur?
- İlk dəfə məşqlərə başlayanda bir mərhələ keçmək barədə düşünə bilmirdik. Məşqlərə gec başladıq. Plan üzrə hazırlıq keçə bilmədik. Amma indi iki mərhələni arxada qoymuşuq. İştah diş altındadır. O mənada indi pley-offda oynamaq istəyərdik. Əlbəttə, bəlkə bu çoxları üçün real deyil. Amma komanda olaraq məğlubiyyət barədə düşünmürük.
- "Atletik"ə qarşı şanslar necədir?
- "İnter" hər zaman yaxşı oynamağa çalışıb. Proqnoz söyləməyi sevmirəm. İslandiyada qələbə qazanacağımızı gözləmirdilər. Amma biz səfərdə 2-1 hesabla qalib gəldik. Bakıda hamı deyirdi ki, rahat olacaq. Nəticədə çətinliklə lazımi nəticəni əldə etdik. O mənada nə baş verəcəyini söyləmək düzgün olmaz.
- "Atletik"in hansı oyununa baxmısan?
- Son olaraq bir neçə oyununu internetdə izləmişəm. Çox yaxşı heyətə malikdir. Futbolçuların çoxu bir neçə ildir komandada çıxış edir. Sürətli hücumları var. Müdafiədə səhvə yol vermək olmaz. "Atletik" səhvləri bağışlamır. Etiraf edək ki, bu bəlkə də ən çətin oyunumuz olacaq.
- "Atletik"in baş məşqçisi "İnter" haqda xoş sözlər deyib. Yəqin bu komandanı arxayınlaşdırmaq üçün səsləndirilib...
- Bilbao klubunun baş məşqçisindən xoş sözlər eşitmək yaxşı haldır. Fikrimcə o komandasının arxayınlaşmasından çəkinir. "Atletik"in heyətində olan futbolçular peşəkardır. Onlar hər bir oyuna ciddi hazırlaşır. Ona görə arxayınçılıqdan söz ola bilməz. Bəlkə Valverde sadəcə olaraq peşəkar danışıb.
- "İnter" üçün hansı nəticəni səfərdə qənaətbəxş saymaq olar...
- "Atletik"in rəqib olması yaxşıdır. Həm klub, həm də futbolçu olaraq adlı-sanlı rəqibə qarşı oynamaq vacibdir. Belə oyunlardan çox şey öyrənmək olar. "İnter" rəqibdən çəkinmir, biz Bakıya yaxşı nəticəylə qayıtmaq üçün 90 dəqiqə mübarizə aparmağa hazırıq. Bizdən uğur gözləmirdilər, amma hamını sevindirdik. İndi çalışacayıq uğurun davamını gətirək.
