Deyvidas Çesnauski: Qəbələ Apollonu keçmək üçün səfərdə daha yaxşı oynamalıdır

"Bakı"nın sabiq yarımmüdafiəçisi, hazırda Litvanın "Trakay" klubunda çıxış edən Deyvidas Çesnauski Avropa Liqasının ikinci təsnifat mərhələsində qarşılaşdıqları, hazırda isə "Qəbələ"yə rəqib olan Kipr "Apollon"u barədə danışıb. Azerisport.az saytına açıqlamasında o, öncə bunları söyləyib:

"Apollon" yaxşı komandadır. Onların məşqçisi portuqaliyalı Pedru Emanueldir. O, futbolu çox yaxşı bilir, oyunun gedişatını dəyişə biləcək mütəxəssisdir. "Apollon"un heyətində portuqaliyalı və latınamerikalı futbolçular var. Onlar çox texnikalı və sürətlidirlər".

"Cinah hücumçularını xüsusi qeyd edərdim. Kirdəki oyunda bizə daha çətin oldu ("Trakay" "Apollon"a səfərdə 0:4 uduzub, ev oyununda 0:0 hesablı heç-heçəyə razılaşıb - red.). "Qəbələ" buna xüsusi diqqət yetirməlidir. Onların cinah ötürmələri də təhlükəli alınır. Elə qolları da bunun sayəsində vurmağa çalışırlar. Hətta cinah müdafiəçiləri də daim hücuma dəstək olurlar".

"Qəbələ" onu da nəzərə almalıdır ki, "Apollon"un az qala hər hücumu qolla nəticələnir. Bu komanda səhvləri də bağışlamır. Bu üzdən "Qəbələ"yə çətin olacaq. Amma fikrimcə, "Qəbələ" bu amilləri nəzərə alıb, rəqibi zərərsizləşdirə bilsə, "Apollon"u keçə bilər. Bildiyimə görə, "Qəbələ" ilk oyunu səfərdə keçirəcək. Məhz səfər oyununda daha yaxşı oynamaq vacibdir. "Apollon" azarkeşləri qarşısında daha yaxşı oynayır. Stadion tam dolu olduğundan futbolçular bundan daha da ruhlanırlar. "Qəbələ"yə uğurlar arzulayıram".