Zurab Xizanişvili: İnter səfərdə qol buraxmasa, evdə Atletiki məğlub edə bilər
"İnter"in müdafiəçisi Zurab Xizanişvili Avropa Liqasının üçüncü təsnifat mərhələsi çərçivəsində İspaniyanın "Atletik" klubuna qarşı keçirəcəkləri ilk oyun öncəsi azerisport.az saytının suallarını cavablandırıb.
- Tarixində ilk dəfə bir mövsümdə iki mərhələ adlayan "İnter"dən bu mövsüm daha nə sürprizlər gözləyək?
- Bu uğurun klubumuzun tarixində bir ilk olduğundan xəbərim var. Deməli, bu, yaxşı bir uğurdur. Amma bununla kifayətlənmək olmaz. Yolumuza davam etməliyik.
- İspaniya La Liqasında çıxış edən "Atletik"ə qarşı oynyacağınızı nəzərə alsaq, bu, nə dərəcədə mümkündür?
- Mən də karyeramda çox şeyin alınacağına inanmırdım. Amma çox şeyə nail olmuşam və buna görə şadam. Niyə "İnter" də özünə inanmasın, yeni tarix yazmasın?
- Komandanız ilk oyunu 52 min azarkeş önündə keçiricəcək...
- Səfərdə qol buraxmamağa çalışmalıyıq. Məsələn, səfərdə 0:0 hesablı heç-heçəyə nail olsaq, ev oyununda 1:0 hesabıyla qalib gəlib mərhələ keçə bilərik (gülür).
- İslandiya "Hafnarfyordur"u ilə son oyununuzda 6 dəqiqəyə iki qol buraxdınız. İspanlara qarşı daha çətin olacağını düşünmürsünüz?
- Həmin oyunda iki qol buraxmağımız konsentrasiyanı itirməyimizin nəticəsi idi. Bunu başqa nə iləsə bağlamaq olmaz. İspanlarla görüşlərdə isə bu, təkrarlanmayacaq.
- İstənilən halda islandlarla ev oyununda inamlı çıxış etmədiniz...
- İslandiyada hazırda mövsümün qızğın çağı olduğundan onlar daha hazırlıqlı idilər. Bizdə isə yeni komandadır. Bütün rəsmi oyunlarımız yalnız Avropa Liqasına təsadüf edir. Anlaşma səviyyəsi hələ istənilən kimi deyil. Zamanla biz daha yaxşı oynayacağıq.
