Stepan Polyak: Atletikin gücü hər kəsə bəllidir, amma biz onlardan qorxmuruq
"İnter"in yarımmüdafiəçisi Stepan Polyak İslandiyanın "Hafnarfyordur" klubuna qarşı keçirdikləri cavab matçından (2:2, ilk oyun 2:1) sonra azerisport.az saytının suallarını cavablandırıb.
- İslandlarla cavab matçının gözlədiyiniz kimi keçmədiyini söyləmək olar?
- Bəli, çox ağır oyun oldu. Biz o qədər də yaxşı oynamadıq. Amma bütövlükdə götürsək, biz bu rəqibdən güclü idik. Növbəti mərhələyə adlamağa borcluyduq. Növbəti mərhələdə də yaxşı çıxış etməyə çalışacağıq.
- İkinci hissəyə çox uğursuz başlamağınıza nə səbəb oldu?
- Ola bilər ki, biz cavab matçında da hesabı açdıqdan sonra arxayınlaşdığımıza görə iki qol buraxdıq. Müdafiədə səhvlərə yol verdik. Amma yaxşı ki, toparlanmağı və daha bir qol vurmağı bacardıq.
- Həmin anda növbəti mərhələyə adlaya bilməyəcəyinizə dair qorxu hiss yaranmamışdı?
- Hesabda geridə olduğumuz dəqiqələr çox çətin idi. Amma komandamız xarakter nümayiş etdirdi. İslandlara, ümumiyyətlə, hər kəsə göstərdik ki, yaxşı futbol sərgiləyə bilirik.
- Növbəti mərhələdə "İnter"i İspaniyanın "Atletik" klubu ilə mübarizə gözləyir. Bilbao təmsilçisi "Laçi" və "Hafnarfyordur" deyil, La Liqada çıxış edir...
- "Atletik" yaxşı komandadır, heyətində güclü futbolçular çıxış edir. Əlbəttə, bu komanda ilə hər iki oyun bizim üçün çətin keçəcək. Amma üzərimizdə heç bir təzyiq yoxdur. Ona görə də meydana rahat çıxacağıq. Sonadək mübarizə aparıb, xarakter göstərməyimiz lazımdır. Yalnız belə olan halda uğur qazana bilərik.
- "İnter"in məşqçilər korpusu elə açıqlama ilə çıxış edir ki, sanki komanda artıq məğlubiyyətlə barışıb. Yəni heç ümidiniz yoxdur?
- Futbolda hər şey olur. Şəxsən mən uduzmağı sevmirəm. Biz daha yaxşı oynamalıyıq. Belə olsa, uğur qazana bilərik. "Atletik"in gücü hər kəsə bəllidir, amma biz onların ad-sanından çəkinmirik.
