Rəşad Sadiqov: Məsuliyyət hissi böyük idi və bunu gözəl bilirdik

"Qəbələ"nin yarımmüdafiəçisi Rəşad Sadiqov Avropa Liqasının ikinci təsnifat mərhələsi çərçivəsində Serbiyanın "Çukariçki" klubu üzərində qazandıqları qələbəni şərh edib. Azerisport.az saytına açıqlamasında o, bunları söyləyib:

"Oyun çox çətin keçdi. Birinci hissədə rəqibimiz bizə oynamağa imkan vermədi. Pressinq tətbiq edirdilər ki, bu da oyunumuza təsir göstərirdi. Serblər boşluq buraxmırdılar. Ona görə hücuma keçməkdə çətinlik çəkirdik. Tədricən oyunumuzu tapdıq. Rəqib isə yorulmağa başladı. Cavab oyununa məğlub tərəf kimi çıxmışdıq. Buna görə böyük məsuliyyət hissi var idi. Komandada stress, həyəcan var idi. İlk dəqiqələrdən hücuma atılsaydıq, qol buraxa bilərdik ki, bu da əlavə problem yaradardı. Ona görə oyuna ehtiyatlı başladıq. Amma qol vəziyyətlərinin olacağını bilirdik. Onlardan yararlanmaq lazım idi. Əsas odur ki, hər şey istədiyimiz kimi alındı".