Mirhüseyn Seyidov: İnter Atletikə də gücünü göstərə bilər
"İnter"in yarımmüdafiəçisi Mirhüseyn Seyidov Avropa Liqasının ikinci təsnifat mərhələsi çərçivəsində İslandiyanın "Hafnarfyordur" klubuna qarşı cavab oyunundan (2:2, ilk oyun 2:1) sonra azerisport.az saytına müsahibə verib.
- Oyun barədə nə deyə bilərsiniz?
- Səfərdə qələbə qazansaq da, cavab matçının çətin keçəcəyini bilirdik. Rəqib fiziki cəhətdən çox güclü idi və uzun ötürmələrdə, ikinci mərtəbədə təhlükəli olurdu. Ola bilsin ki, səfər qələbəmiz müəyyən əminlik yaratmışdı. Üstəlik, mərhələ adlayacağımız halda İspaniyanın "Atletik" klubu ilə qarşılaşacağımız da bəlli idi. Cavab oyununda qələbə qazana bilməsək də, növbəti mərhələyə adladıq. Klubun üzləşdiyi belə çətin bir vəziyyətdə iki mərhələ adlamağımız çox yaxşıdır.
- "İnter"in ikinci hissəyə rəqibdən gec çıxmasına nə səbəb oldu?
- Belə hallar olur. Əsas odur ki, komandamız fasilədən sonra buraxılan qollardan sınmadı. Duruş gətirdik, əlavə vaxtda növbəti mərhələyə vəsiqəni təmin edən qolu da vurduq. Məncə, bu, qələbəni daha da şirinləşdirdi.
- "Hafnarfyordur"un futbolçusunun meydandan qovulmasının bu yolda həlledici olduğunu demək olar?
- Fikrimcə, hə. Çünki bu, bizə əlavə üstünlük qazandırdı. Amma qonaqlar yenə də təhlükəli idilər. Üstəlik, bizim də üzərimizdə müəyyən təzyiq var idi. Axı komandamız heç vaxt bir mövsümdə iki mərhələ keçə bilməmişdi. Xoşbəxtlikdən, bu uğursuz gedişata son qoymağı bacardıq.
- "İnter"in hər iki qolunu yerli futbolçu vurdu...
- Deməli, "İnter"də yaxşı yerli futbolçular cəmləşib.
- Növbəti mərhələdə İspaniya "Atletik"i ilə qarşılaşacaqsınız. Amma bu komandanı keçəcəyinizə çox az adam inanır. Bəs siz özünüz?
- Biz hələ böyük uğur qazanmamışqı. İlk dəfə üçüncü təsnifat mərhələsinə adlasaq da, bunu şişirtməyə ehtiyac olmadığını düşünürəm. Bu avrokubok mövsümündə daha ciddi uğurlar qazana bilərik. "Atletik" adlı-sanlı klubdur. Amma biz onlara da öz gücümüzü göstərə bilərik.
- Bunu İspaniyada etməyə çalışacaqsınız, ya Bakıda?
- Bəxt bizim tərəfimizdə olsa, İspaniyadan da yaxşı nəticə ilə qayıa bilərik. Orada böyük hesabla uduzmamaq vacibdir. Amma hətta uduzsaq da, səfərdə bir qol vurmalıyıq ki, ev oyununda nəsə etməyə şansımız qalsın.
