Qudyonsson: Ümid edirəm ki, Neftçi ilə oyunlardakı aqibətlə üzləşməyəcəyik

İslandiyanın "Hafnarfyordur" klubunun baş məşqçisi Heymir Qudyonsson Avropa Liqasının ikinci təsnifat mərhələsi çərçivəsində "İnter"ə qarşı keçirəcəkləri cavab matçı öncəsi fikirlərini açıqlayıb. Azerisport.az xəbər verir ki, o, bunları söyləyib:

"Birinci oyunda pis oynamadıq, sadəcə, səhvlərimiz oldu. Qırmızı vərəqə və penaltidən sonra oyun dəyişdi. Amma cavab oyununa müsbət əhval-ruhiyyədə köklənmişik. Çətin oyun olacağını bilirik. Stimul da var. Çünki sabahkı oyunda qalib gəlsək, İspaniya "Atletik"i kimi rəqibə qarşı oynamaq şansı qazanacağıq. Bu üzdən növbəti mərhələyə vəsiqə qazanmağı çox istəyirik. Bizim üçün bu, vacibdir. Ümid edirəm ki, "Neftçi"yə uduzduğumuz kimi, "İnter" səddinə də ilişməyəcəyik. O vaxt da komandamız evdə 1:2, səfədə 0:2 hesabıyla uduzmuşdu. Yeri gəlmişkən, həmin oyunlarda mən də iştirak etmişdim. Hazırda Bakıda çox isti var. Amma oyun saat 21:00-da start götürəcək. Ona görə havanın sərin olacağına ümidliyəm".