Mirko Mariç: Qarabağın qol vurmayacağını gözləməyə dəyməz

Çernoqoriyanın "Rudar" klubunun baş məşqçisi Mirko Mariç UEFA Çempionlar Liqasının ikinci təsnifat mərhələsi çərçivəsində "Qarabağ"a qarşı keçirəcəkləri cavab matçını şərh edib. Azerisport.az xəbər verir ki, o, Petrovaçda baş tutacaq oyun öncəsi bunları söyləyib:

"Bilirəm ki, Bakıdakı heç-heçə çoxunu təəccübləndirdi. Belə bir rəqibə qarşı bu cür nəticə çox yaxşıdır. Amma "Qarabağ" yenə də favoritdir. İlk oyundakı sərfəli nəticəyə baxmayaraq, cavab görüşündə də öz planlarımıza uyğun oynayacağıq".

"Cavab matçının da qolsuz bitməsi ehtimalı azdır. "Qarabağ"ın səfərdə də qol vurmayacağını gözləmək çətindir. Bu komanda toplanış müddətində güclü klublara qarşı yoxlama oyunları keçirib. Həmin komandalara da ən azı bir qol vurmuşdu".

"Biz yenə öz oyun üslubumuzdan yararlanmağa çalışacağıq. Amma hücumlar zamanı qapıya dəqiq zərbə vurmalıyıq. Ən əsası isə Bakıdakı ilə müqayisədə daha yaxşı oyun sərgiləməliyik. Ağıllı və səbrli olmaq lazımdır. Erkən qol buraxmaq heç də yerinə düşməyəcək. Əks halda bizə çox çətin olar. Çünki belə olan halda biz rəqib üçün daha çox boşluqlar buraxacağıq. "Rudar" favorit deyil. Komandamızın üzərində təzyiq də yoxdur. Amma "Qarabağ"ın üzərində təzyiq olduğunu demək olar. Çünki hər kəs bu klubun cütün taleyini elə ilk oyunda həll edəcəyini gözləyirdi".

Mariç əlavə vaxtın mümkünlüyünə də toxunub: "Gəlin öncə 90 dəqiqə barədə düşünək. Lazım gələcəyi halda əlavə vaxt barədə də düşünmək olar. Hətta penaltilərə hazırlaşdığımızı soruşanlar da var. Amma buna hələ çox var".

"Qarabağ" 30 min azarkeş qarşısında oynamağa alışıb. Təbii ki, bizim arenamızda Bakıdakı kimi atmosfer olmayacaq. Amma bu, rəqibə heç bir mənfi təsir göstərməyəcək".