Ramin Musayev: Yalnız Rəvanın elitada çıxış etməyə maddi imkanı vardı
Peşəkar Futbol Liqasının prezidenti Ramin Musayev bu gün təşkil olunan Premyer Liqanın yeni mövsümünün püşkatma mərasimində fikirlərini açıqlayıb. Azerisport.az xəbər verir ki, o, öncə "Simurq"un çempionatdan imtinası ilə bağlı fikirlərini bölüşüb:
"Simurq"un yaşayacağına ümidliyəm. Amma reallıq belədir ki, klubun hazırda ciddi problemləri var. Biz Zaqatala təmsilçisinin yaşamasına kömək etməyi çox istəyirdik. Amma buna maddi gücümüz çatmadı".
O, "Simurq"u elitada əvəzləməli olan "Rəvan"la da bağlı danışıb: "Fors-major vəziyyət qeydə alındı. Çünki Bakı təmsilçisi bir müddət öncə Premyer Liqa üçün lisenziya ala bilməmişdi. Hansısa klub çempionatda iştirakdan imtina edirsə, doqquz komanda ilə çempionat keçirə bilməzdik ki. "Rəvan" sağ olsun ki, elitada iştirak etməyə razılıq verdi. Onların lisenziya problemini yoluna qoymaq üçün sentyabrın sonunadək vaxtı var. Yalnız onlara müraciət etdik. Hansısa başqa klubun Premyer Liqada iştirak etməyə gücü çatırsa, bizə xəbər versin. Ancaq biz belə bir imkana yalnız "Rəvan"ın malik olduğunu bilirik".
Musayev hətta Premyer Liqa klublarının sayının 12-yə çatdırılmasının mümkünlüyünü də vurğulayıb: "Bu gün yeni mövsümün püşkü atıldı. Amma buna baxmayaraq, hansısa klub Premyer Liqada iştirak etmək istəsə, bizə müraciət edə bilər. Bunu demək asandır. Bilirik ki, buna maddi gücü yetərincə olan komandalar yoxdur".
"Çempionatın reqlamentində dəyişiklik yoxdur. Klublar yerli futbolçulara üstünlük verməyə başlayıblar. Fikrimcə, bu, Premyer Liqanın səviyyəsinin düşməsinə səbəb olmaz. Yerli kadrlara da güvənmək lazımdır. PFL-in çempionatı təşkil etdiyi bu yeddi ildə həmişə maraqlı mübarizənin şahidi olmuşuq. Başqa cür ola da bilməz".
PFL prezidenti maliyyə problemləri olan "İnter"in avrokuboklardakı çıxışına da toxunub: "İnter"də problem yoxdur. Komanda yaxşı oynayır, bizi sevindirir. Bizim borcumuz bu kluba kömək etməkdir. AFFA sağ olsun ki, komandaya köməyini əsirgəmir"
Musayev "Topaz"ın Premyer Liqadan imtina etdiyini və yeni sponsor tapılmadığını söyləyib: "Sponsor hələ yoxdur. Çempionata sponsor tapa bilmirik. İndi heç yeni sponsor axtarmırıq da".
