Zaur Svanadze: İnterə qətiyyən arxayınlaşmaq olmaz
"İnter"in baş məşqçisi Zaur Svanadze Avropa Liqasının ikinci təsnifat mərhələsi çərçvəsində İslandiyanın "Hafnarfyordur" klubuna qarşı keçirəcəkləri cavab oyunu öncəsi azerisport.az saytının suallarını cavablandırıb:
- Komandada atmosfer necədir? Cavab oyununa hazırlıq necə keçir?
- Komandada hər şey yaxşıdır, futbolçular özlərini yaxşı hiss edirlər. Hazırlığımız da adi qaydada davam edir. Qarşıda bizi çətin oyun gözləyir. İlk oyunda qalib gəlsək də, rəqibimiz sıradan komanda deyil.
- Səfərdəki qələbə arxayınlıq yaratmaz ki?
- Qətiyyən! Ötən il İsveçin "Elfsborq" klubuna qarşı keçirdiyimiz oyunları yada salmaq yetərlidir. O vaxt da səfərdə qalib gəlmişdik, amma ev oyununda məğlubiyyətlə üzləşdik. Həmin oyunun xatirəsi hələ çox təzədir. Ona görə də qətiyyən arxayınlaşmaq olmaz. "İnter"də arxayınlaşma görməyəcəksiniz.
- "İnter" səfərdəki oyunda yalnız rəqib azlıqda qaldıqdan sonra dönüş yarada bildi. "Hafnarfyordur" tam heyətlə dişinizə görə rəqibdir?
- Birinci hissədə onlar daha üstün oynadılar. Amma biz penaltiyə qədər oyuna yaxşı nəzarət edirdik. Bütövlükdə isə rəqibin qoldan başqa təhlükəli qol vəziyyəti olmadı. Yaratdıqları təhlükəli vəziyyətlər də standart vəziyyətlər zamanı olurdu.
- Birinci təsnifat mərhələsi çərçivəsində Albaniya "Laçi"si ilə ev oyununda olduğu kimi, bu dəfə də sizi heç-heçə qane edir. Oxşar oyun gözləməyə dəyər?
- Bəli, elə demək olar. Amma biz müdafiədə oturmaq barədə düşünmürük.
- Yenə qolsuz heç-heçənin qeydə alınması nə dərəcədə inandırıcıdır?
- (gülür) Mən bunu sizə deyə bilmərəm. Bircə məsələni bilirəm ki, öz cərimə meydançamızda oturası olsaq, hər şey bizim üçün pis nəticələnər. Rəqib standart vəziyyətlərdə, "ikinci mərtəbədə" çox güclüdür.
- Üçüncü təsnifat mərhələsində İspaniyanın "Atletik" klubu ilə qarşılaşa bilərsiniz. Bu, sizi məyus etdi?
- Mən bu barədə düşünmürəm. Öncə İslandiya klubunu keçməyi düşünməliyik.
- "Atletik"in baş məşqçisi artıq "İnter Arena"nın qazonundan şikayətlənir...
- Bu, onların haqqıdır. Amma bizim onlarla oyunlardan danışmağımız düzgün olmaz.
- Hər halda növbəti mərhələdə belə bir rəqiblə düşəcəyinizi gözləyirdiniz?
- Belə güclü rəqiblərə qarşı oynamaq daha yaxşıdır. Böyük təcrübə və özünə əminlik qazanacağıq. Axı bu, La Liqa klubudur.
