Fuad Bayramov: İnter Hafnarfyordura məğlub olmaq haqda düşünmür
"İnter"in yarımmüdafiəçisi Fuad Bayramov Avropa Liqasının ikinci təsnifat mərhələsi çərçivəsində İslandiyanın "Hafnarfyordur" klubuna qarşı keçiriləcək ilk oyun öncəsi azerisport.az saytının suallarını cavablandırıb:
- Qarşıdakı oyundan gözləyirsiniz?
- Səfərdən yaxşı nəticə ilə qayıtmağa çalışacağıq. Bunun üçün isə müdafiədə yaxşı oynamaq lazımdır ki, qol buraxmayaq.
- Hava şəraiti və vaxt fərqi sizə problem yaratmayacaq?
- Hava bir qədər soyuqdur. Amma vaxt fərqi çox böyükdür. Nə etmək olar, oynamalıyıq. Bunlar bizə problem yaratmamalıdır.
- "Hafnarfyordur" çempionatda və avrokuboklarda sabit çıxış edir və böyük təcrübəyə malikdir. Bu, sizi qorxutmur?
- "İnter" də demək olar ki, hər il avrokuboklarda çıxış edir. Rəqibin təcrübəsi bizi qorxutmur.
- "İnter" demək olar ki, yenidən heyət qurub. Bu, daha bir mərhələ keçməyə problem yaratmayacaq?
- Kollektivimiz yenidir. Amma Albaniyanın "Laçi" klubu ilə oyunlarda hamı ürəkdən oynadı, yaxşı mübarizə apardı. Allah eləsin ki, matçdan matça daha da yaxşı çıxış edək.
- Rəqib komandanın hansı üstünlükləri var?
- Rəqib futbolçuların əksəriyyəti ucaboydurlar. Ona görə də bizə standart vəziyyətlər zamanı ehtiyatlı oynamaq lazımdır. İslandlar bundan çox yaxşı yararlanırlar.
- Ən pis halda 1:2 hesablı məğlubiyyət sizi qane edə bilər?
- Xeyr, siz nə danışırsınız! Biz ümumiyyətlə məğlubiyyət haqda düşünmürük. Hesabın necə olacağını matçdan sonra biləcəyik. Amma meydana məğlub olmaq üçün çıxmayacağımız dəqiqdir.
- "İnter" "Hafnarfyordur" səddini də keçə biləcək?
- Bu, futboldur, hər şey ola bilər. İndi əsas məqsədimiz İslandiyadan müsbət nəticə ilə qayıtmaqdır. Sonrasını zaman göstərəcək.
- Qrup mərhələsinə düşmək barədə düşünürsünüz?
- Futbolda hər şey olur. Əsas istəyin olmasıdır. Özünüz də görürsünüz ki, istənilən komanda qrup mərhələsində çıxış edə bilər. Məğlubedilməz komanda yoxdur. Biz də ölkəmiz və "İnter" adına çalışacağıq ki, buna nail olaq.
