Marko Randjeloviç: Qəbələ səddini keçə bilməsək, faciə olmayacaq
Serbiyanın "Çukariçki" klubunun müdafiəçisi Marko Randjeloviç Avropa Liqasının ikinci təsnifat mərhələsi çərçivəsində "Qəbələ"yə qarşı ilk oyun öncəsi azerisport.az saytının suallarını cavablandırıb:
- "Qəbələ"nin Tiflis "Dinamo"su ilə oyunlarına baxmısınız?
- Xeyr, baxmamışam. Biz həmin vaxt "Domjale" ilə oyunlara hazırlaşırdıq. Amma həmin oyunlardan sonra matçın icmalına da baxmağa imkan olmayıb.
- "Qəbələ" ilə qarşılaşacağınızı gözləyirdiniz?
- Düzünü deyim ki, mən "Dinamo" ilə qarşılaşmağımızı istəyirdim.
- Niyə?
- "Qəbələ" ilə müqayisədə gürcülər o qədər güclü deyildilər. "Qəbələ"nin heyətində yaxşı futbolçular var. "Dinamo"da isə əsasən gənc və təcrübəsiz futbolçular cəmləşiblər. Onları keçmək olardı.
- İlk oyunun Belqradda keçirilməsi sizin üçün üstünlükdür?
- Fikrimcə, ilk oyunun evdə və ya səfərdə keçirilməsi o qədər də vacib deyil. Çünki hər iki komanda həm evdə, həm də səfərdə oynayacaq. Mərhələ adlamaq üçün sadəcə, hər iki oyun oyunda müsbət nəticə qazanmağa ehtiyac var.
- "Qəbələ" barədə nə bilirsiniz?
- Düzünü deyim ki, məndə Azərbaycan futbolu barədə xüsusi məlumatım yoxdur. Amma "Qəbələ"ni yaxşı tanıyıram. Azərbaycanda çıxış etmiş dostlarım var. Onlar bizim rəqibimizlə bağlı mənə danışıblar. Hamısı deyir ki, "Qəbələ" yaxşı təşkilatlanmış komandadır, maliyyə vəziyyəti çox yaxşıdır. Heyətlərində güclü legionerləri var. Ona görə də mənə elə gəlir ki, həm "Qəbələ"ni, həm də "Çukariçki"ni çətin oyunlar gözləyir.
- "Qəbələ"nin müdafiəçisi Voyislav Stankoviçlə bu oyunlarla bağlı söhbətiniz olub?
- Tanışıq, amma bu barədə söhbətimiz olmayıb. Ona qarşı çox oynamışam. Güclü müdafiəçidir.
- "Qəbələ"ni keçə bilməmək sizin üçün faciə olmayacaq?
- Xeyr. Niyə ki?
- Çünki Azərbaycan klubları Avropada hələ biz istədiyimiz səviyyədə deyillər...
- (gülür) Siz bizim indidən uduzmağımızı istəyirsiniz. Amma yox. Bizim yaxşı komandamız var. Uğur qazanmaq arzumuz da böyükdür. Qrup mərhələsinə düşmək üçün mübarizə aparırıq. Amma "Qəbələ"ni keçə bilməsək, bunu problemə çevirməyəcəyik. Mərhələ adlamaq üçün əlimizdən gələni edəcəyik.
