Qurban Qurbanov: Rudarı artıq daha yaxşı tanıyırıq

Azərbaycan çempionu "Qarabağ"ın baş məşqçisi Qurban Qurbanov UEFA Çempionlar Liqasının ikinci təsnifat mərhələsi çərçivəsində Çernoqoriya "Rudar"ına qarşı keçirdikləri ilk oyunu şərh edib. Azerisport.az xəbər verir ki, Ağdam klubunun çalışdırıcısı 0:0 hesabıyla bitən qarşılaşmadan sonra bunları söyləyib:

"Komandamız yaxşı müdafiə olundu. Diqqətli oynadıq. Amma "Rudar" da sonadək mübarizə apardı. Təəssüf ki, qol vura bilmədik. Əsas hədəfimiz qol vurmaq və buraxmamaq idi. Qol vura bilmədik, amma buraxmadıq da. Uzaqdan zərbə vurmağa imkanımız yox idi. Çünki rəqib futbolçular buna da imkan vermirdilər.

Səfərdəki oyun çətin də ola bilər, asan da. Cavab oyununa daha yaxşı hazırlaşmalıyıq. Çünki indi rəqibi daha yaxşı tanıyırıq. Komandamın oyunundan narazı olduğumu deməzdim.

Klubun yeni futbolçularının oyununa gəlincə, normal çıxış etdilər. Amma hələ tam hazır deyillər. Daha yaxşı oynayacaqlarına ümid edirik.

Komandanı dəstəkləməyə gələn bütün azarkeşlərə təşəkkürümü bildirirəm".