Qarabağ - Rudar matçının ucuz biletləri baha qiymətə satılır
UEFA Çempionlar Liqasının ikinci təsnifat mərhələsi çərçivəsində keçiriləcək "Qarabağ"la Çernoqoriya "Rudar"ı arasındakı ilk oyuna bilet satışı davam edir. Azerisport.az xəbər verir ki, biletləri matçın keçiriləcəyi Tofiq Bəhramov adına Respublika stadionunun kassalarından almaq olar.
Artıq təxminən 20 000 bilet satılıb. Oyun saatına qədər bu göstəricinin daha da artması istisna olunmur.
Lakin bilet işbazları yenə fəaliyyətə başlayıblar. Klub özü bilet satışına nəzarət etdiyini açıqlasa da, polislər prosesi nəzərdə saxlasalar da, "qara bazar"da baha qiymətə bilet satılır. Məsələn, işbazlar 2 manatdan aldıqları biletləri sadə azarkeşlərə 6 manatdan satırlar. Hətta 3 və ya daha çox bilet istəyənlərə bundan da baha qiymət oxunur. Ən maraqlısı isə odur ki, polislər bu vəziyyəti gördükləri halda, müdaxilə etmirlər.
