Elmar Baxşiyev: Qarabağ və Qəbələ mərhələ keçəcək
Azərbaycan yığmasının sabiq yarımmüdafiəçisi Elmar Baxşiyev avrokuboklardakı təmsilçilərimizin şanslarını dəyərləndirib. Azerisport.az saytına açıqlamasında o, bunları söyləyib:
"Qarabağ" (UEFA Çempionlar Liqası, ikinci təsnifat mərhələsi, "Rudar", Çernoqoriya)
"Qarabağ"ın qələbə qazanacağını gözləyirəm. Bu komandanın avrokuboklarda təcrübəsi böyükdür. "Qarabağ" növbəti mərhələyə adlayacaq.
"Qəbələ" (Avropa Liqası, ikinci təsnifat mərhələsi, "Çukariçki", Serbiya)
"Qəbələ"ni Serbiyada çətin oyun gözləyir. Onlar Tiflis "Dinamo"suna qarşı Qəbələ oynadıqları kimi çıxış etsələr, növbəti mərhələyə vəsiqə qazana bilərlər. Amma mənə elə gəlir ki, cütün taleyinə Bakıdakı oyunda aydınlıq gələcək.
"İnter" (Avropa Liqası, ikinci təsnifat mərhələsi, "Hafnarfyordur", İslandiya)
"İnter"i də çətin səfər qarşılaşması gözləyir. İslandiya futbolu son illərdə yüksəlişdədir. "İnter" səfərdən sərfəli nəticə ilə qayıtmağa nail olsa, Bakıdakı oyunda nəyəsə ümid edə bilər.
Fikrimcə, istənilən halda "Qarabağ"la "Qəbələ" mərhələ keçə biləcək.
