Elnur Allahverdiyev: Milli komandaya qayıtmaq planlarım da var
Azərbaycan yığmasının sabiq yarımmüdafiəçisi Elnur Allahverdiyevin azerisport.az saytına müsahibəsi
- Siz yenidən "Xəzər Lənkəran"a qayıtmaq istədiyinizi, klub isə bunda maraqlı olmadığını açıqlayıb. Onlar bunu istəməsələr, nə edəcəksiniz?
- İlk növbədə oraya qayıtmaq istəyirəm. Orada mənə doğrudan da yaxşı olardı. Yunis Hüseynovla əlaqə yaratmağa çalışacağam. Alınmasa, başqa variantlara baxacağam.
- Artıq uzun müddətdir futbol oynamırsınız. Yəqin ki, artıq çəkiniz də var...
- Fərdi qaydada məşq edirəm. İmkan olanda ikitərəfli oyunlarda iştirak edirəm. Çəkim normaldır. Düzünü deyim ki, heç futbola qayıtmamağı düşünürdüm. Amma sonra fikirləşdim ki, gücüm varsa, niyə oynamayım? Həm də futboldan bu formada getməyə layiq olmadığımı düşünürəm. Yığma komandaya qayıtmaq da planlarımda var.
- Bəs "Neftçi" ötən ilin sonunda sizi heyətdən kənarlaşdıranda niyə futboldan getməyə qərar verdiniz?
- Çünki mənə qarşı düzgün münasibət göstərmədilər. Futbolçunu müxtəlif formada cəzalandırmaq olar. Cərimə edərdilər, əvəzedici komandaya göndərərdilər. Niyə mənə qarşı elə etdilər ki? Heç vaxt karyeramda pula görə münaqişə yaratmamışam. Nə qədər veriblər, ona da razılaşmışam. Klubda elə insanlar var idi ki, futboldan başları çıxmadığı halda vəzifə tuturdular.
- Yəqin ki, Azərbaycan klublarının indiki durumundan xəbəriniz var. Artıq futbolçulara əvvəlki pulu vermirlər...
- Bu, mənim üçün problem deyil. Heç vaxt pula qaçmamışam. Mən sadəcə, futbol oynamaq istəyirəm. Amma "Neftçi"də mənə qarşı çox pis davrandılar. Çünki mən yığma komandanın futbolçusu idim. Yenidən "Neftçi"də oynamağa qərar verməklə səhvə yol verdim. Mənə qarşı elə davranacaqlarını bilsəydim, bu kluba qayıtmazdım.
- Qışda Türkiyə klublarından təklif olsa da, qəbul etmədiniz...
- Bəli, variantlar var idi. Amma o qədər acıqlı idim ki, futbol oynamağa həvəs qalmamışdı, o halda heç bir kluba fayda verə bilməzdim. Pula görə hansısa kluba keçə bilərdim, bəs sonra? Mənim vüqarım puldan daha vacibdir. Çoxlu səhvim olmuşdu. Mən mələk deyiləm. Amma həmişə bunu oynadığım klublara çox bağlandığıma görə etmişəm.
