Sergey Zenyov: Səfərdə 1:2 hesablı məğlubiyyət bizi qane etməyəcək
"Qəbələ"nin hücumçusu Sergey Zenyovun azerisport.az saytına müsahibəsi
- Avropa Liqasının birinci təsnifat mərhələsi çərçivəsində Tiflis "Dinamo"su ilə cavab matçındakı ilk qolun sizin adınızdan silinib, Asif Məmmədovun adına yazılmasını necə qarşıladınız?
- Normal. Mənim öncədən də heç bir irdım yox idi. Çünki onu mən yox, Asif vurmuşdu. Əsas odur ki, bu qol alındı, onu kimin vurması isə önəmli deyil.
- İlkin təsnifat mərhələsində qol vura bilməyən Zenyova bu dəfə fərqlənmək nəsib olacaq?
- Yüz faiz qol vuracağımı söz verə bilmərəm. Amma çalışacağam. Hücumçu olduğuma görə qol vurmaq, komandama qələbə qazandırmaq mənim işimdir.
- "Çukariçki" ilə oyuna hazırlıq necə gedir?
- "Dinamo" üzərindəki vacib qələbədən sonra komandada çox müsbət əhval-ruhiyyə var. Belə bir vəziyyətdə növbəti matça hazırlıq qətiyyən pis gedə bilməz. Daha bir vacib qarşıdurmaya ciddi hazırlaşırıq.
- Növbəti rəqibin daha güclü olduğunu nəzərə alsaq, şansları necə qiymətləndirirsiniz?
- Şansları dəyərləndirməyəcəyəm. İstənilən halda öz futbolumuzu oynamaq və qələbə qazanmaq haqda düşünəcəyik.
- Yəqin ki, komandada özünəinam artıb. "Qəbələ" bu dəfə də mərhələ keçə bilər?
- Necə olacağını hamımız birlikdə görəcəyik. Amma təbii ki, biz də qələbələrimizin sayının daha çox olmasını istəyirik.
- "Dinamo" ilə oyunlardakı ssenarini nəzərə alsaq, səfərdə yenə 1:2 hesablı məğlubiyyət sizi qane edəcək?
- Xeyr, qane etməz. Bizi hansı hesabın qane edəcəyini də düşünməməliyik. Məğlubiyyət isə ümumiyyətlə komandanı qane edə bilməz. Yalnız qələbə barədə düşünürük. Oyunlara da o istəklə çıxacağıq.
