"Neftçinin inkişafına dair strategiyamız Samir Əliyevlə bağlıdır və onu dəyişmək fikrimiz yoxdur"

"Neftçi"nin idman direktoru Vəli Qasımovun azerisport.az saytına müsahibəsi

- Avropa Liqasının birinci təsnifat mərhələsində Çernoqoriya "Mladost"unu keçə bilməməyinizi necə qəbul etdiniz?
- Hələ də çox böyük üzüntü var. Hər iki oyunda rəqibimizdən daha yaxşı çıxış etdik. Amma digər tərəfdən başa düşürük ki, komanda hələ lazım olan səviyyədə deyil. Əsas odur ki, komanda ritmi itirməsin. Bu tempdə davam etsək, daha böyük uğurlara imza ata bilərik.

- Avroliqada uğur qazanılmayacağı halda Samir Əliyevin baş məşqçi postundan göndəriləcəyi bildirilirdi...
- Fikrimcə, o, qalacaq. Biz onun işindən razıyıq. Eləcə də köməkçilərinin. Çətin ki, dəyişiklik olsun. Bizim klubun inkişafına dair strategiyamız Samir Əliyevlə bağlıdır. Bu strategiyanı dəyişmək fikrimiz də yoxdur.

- Çernoqoriyadakı oyundan sonra dava salan Maksim Vaylo ilə Ayltonu hansı cəza gözləyir?
- Bu görüşlərin ən xoşagəlməz məqamı məhz həmin hadisə oldu. Peşəkar baxımdan yanaşsaq, futbolçuların bu hərəkəti qətiyyən düzgün deyildi. Onlara pul cəriməsi kəsiləcək. Amma Aylton davada iştirak etməyib. Davaya səbəb olan Maksim Vaylo ilə Rahil Məmmədov olub. Lakin istənilən halda belə hərəkətlər "Neftçi"yə yaraşmır. Onlar klubun imicinə zərbə vurdular.

- Heyətin daha da gücləndirilməsi mümkündür?
- Böyük ehtimalla yeni futbolçular olacaq. Çünki güclənməsinə ehtiyac duyulan mövqelər var. Yeni futbolçular legioner olacaq.

- Neçə transfer etməyi düşünürsünüz?
- Bir və ya iki mövqeyə legioner almağı düşünürük.

- Yeni mövsümə hazırlıq üçün yenidən xaricə getməyi düşünürsünüz?
- Toplanış keçməyi düşünürük. Böyük ehtimalla xaricdə hazırlaşacağıq. Hazırda bu məsələ üzərində iş gedir. "Neftçi"yə güclü sınaqçı-rəqiblər də lazımdır.