İqor Matiç: Qəbələ favoritdir, amma biz sürpriz etməyə çalışacağıq

Serbiyanın "Çukariçki" klubunun kapitanı İqor Matiç Avropa Liqasının ikinci təsnifat mərhələsi çərçivəsində "Qəbələ"yə qarşı keçirəcəkləri oyunlarla bağlı azerisport.az saytının suallarını cavablandırıb:

- "Qəbələ"yə keçməzdən öncə, ilk təsnifat mərhələsindəki rəqibiniz - Sloveniya "Domjale"si ilə oyunlarınız barədə danışmağınızı istərdik - (1:0, 0:0).
- Bu komanda ilə oyunlarımız doğrudan da çətin alındı. Amma biz vəziyyətdən çıxmağı bacardıq. "Domjale" güclü komanda idi. Lakin biz bu komandanı mübarizədən kənarlaşdıra bildik.

- "Qəbələ" isə Tiflis "Dinamo"suna qalib gəldi. Bu klublardan hansı ilə qarşılaşmağı arzulayırdınız?
- Hər iki komanda güclü rəqib idi. Amma bizə "Qəbələ" nəsib oldu. Gələcək rəqibimiz barədə çox danışmaq istəmirəm. Nəyin necə alınacağını oyunlar göstərəcək.

- "Qəbələ" barədə nə bilirsiniz?
- Bilirəm ki, yaxşı komandadır. Heyətində xeyli legioner çıxış edir.

- Onlardan hansınısa tanıyırsınız?
- Yalnız üç futbolçunu tanıyıram. Biri serbiyalı Voyislav Stankoviçdir. O, vaxtilə "Partizan"da oynayıb. Aleksey Antonovla "Dnepr"də birgə çıxış etmişik. Moskva "Torpedo"su ilə "Dinamo"da çıxış etmiş Georgi Floreskunu da yaxşı tanıyıram.

- "Qəbələ"nin oyunlarına baxmısınız?
- Bəli, "Qəbələ"nin "Dinamo" ilə cavab oyununu görmüşəm.

- Şansları necə qiymətləndirərsiniz?
- Mənim fikrimcə, "Qəbələ" cütün favoritidir. Amma biz sürpriz etməyə çalışacağıq.

- İlk oyun Serbiyada keçiriləcək. Bunu sizin üçün üstünlük hesab etmək olar?
- Xeyr, bu, rəqibin üstünlüyüdür. Çünki "Qəbələ" cavab oyununu doğma azarkeşləri qarşısında keçirəcək.

- İlk mərhələdə komandanızın yeganə qolunu siz vurmusunuz. "Qəbələ" ilə oyunlarda da eyni nəticəni gözləyirsiniz?
- Qol vurmağa, fanatlarımızı sevindirməyə çalışacağam. Amma "Çukariçki"nin oyunu tək məndən asılı deyil. Biz güclü komandayıq.