Rəşad Sadiqov: Mükafat? Dinamo üzərində qələbə elə mükafatdır
"Qəbələ"nin yarımmüdafiəçisi Rəşad Sadiqov Avropa Liqasının birinci təsnifat mərhələsi çərçivəsində Tiflis "Dinamo"su (Gürcüstan) üzərində qazandıqları qələbədən (2:0, ilk oyun 1:2) sonra azerispot.az saytının suallarını cavablandırıb.
- Oyun barədə nə deyə bilərsiniz?
- Çox çətin oyun alındı. Qələbə isə xüsusidir. Oyunun sonlarında iki qol vurmaqla qalib gəlməyin yeri başqadır. Ona görə də çox sevincliyik.
- Matçın sonunda təzyiqi daha artırdınız və qollar vurdunuz. Bunu daha tez etmək olmazdı?
- Prinsipcə, biz bütün oyun ərzində daha üstün idik. 90 dəqiqə ərzində rəqib qapısı qarşısında qol vəziyyətləri yaratmaq böyük güc tələb edir. Biz də bunu edə bildik və sonda istəyimizə çatdıq.
- Top sanki "Dinamo"nun qapısına daxil olmaq istəmirdi. Həmin anlarda ruhdan düşmürdünüz?
- Bizim ilk dəqiqələrdən etibarən qol vəziyyətlərimiz olurdu. Əlbəttə, vaxt keçdikcə hesabı aça bilməməyimiz bizi daha çox narahat etməyə başlayırdı. Amma inanmağa davam edirdik. İnam çox yaxşı şeydir.
- "Qəbələ"nin bu oyunda xarakter nümayiş etdirdiyini demək olar?
- Elədir ki, var. Biz əsl xarakter göstərdik. Qələbəmiz də tam layiqli idi. Biz "Dinamo"dan bütün komponentlərdə üstün idik.
- Siz bu xarakteri Tiflisdəki oyunda göstərsəydiniz, yəqin ki, vəziyyət bu həddə çatmazdı...
- Sizinlə razıyam.
- Oyundan sonra klub prezidenti Tale Heydərov komanda ilə görüşdü. O, sizə nə dedi?
- Qələbə münasibətilə bizi təbrik etdi. Bildirdi ki, bizə inanır. Növbəti oyunlarda uğurlar arzuladı.
- Mükafat söz verildi?
- Xeyr, mükafatla bağlı heç bir söhbət olmadı. Qələbənin özü elə bir mükafatdır.
- Növbəti mərhələdə "Qəbələ"dən nə gözləyək?
- "Qəbələ"nin potensialı növbəti mərhələdə də uğur qazanmağa imkan verir. Çalışacağıq ki, yenə uğur qazanaq.
