Roman Qriqorçuk: Cavab matçında qol vuracağımıza sonadək inanırdıq

"Qəbələ"nin baş məşqçisi Roman Qriqorçuk Avropa Liqasının birinci təsnifat mərhələsi çərçivəsində Gürcüstanın "Dinamo" (Tiflis) klubu ilə cavab görüşündə qazandıqları qələbəni (2:0, ilk oyun 1:2) şərh edib. Azerisport.az xəbər verir ki, o, bunları dilə gətirib:

"Etiraf edim ki, çox çətin oyun alındı. Bu oyuna xüsusilə psixoloji cəhətdən hazırlaşmaq çox çətin idi. Hər bir oyunçu ilə xüsusi söhbət edirdim, oyuna hazırlayırdım. Bu qələbənin önəmini izah etməyə söz tapa bilmirəm. Bizim üçün çox sevindirici qələbədir. Bizi dəstəkləyən hər bir kəsə təşəkkürümü bildirirəm. İnanın ki, Tiflisdəki məğlubiyyət bizə pis təsir etmişdi. Həmin uğursuzluğu unutmaq çətin idi.

Rəşad Sadiqovun oyunundan narazı olduğumu deməzdim. Ona görə də onu gec əvəzlədim. Ötən gün baş tutan məşqdə standart vəziyyətlər üzərində çox çalışmışdıq. Ən azı iki elə qol vura bilərdik. Amma oyunda bunu etmək çətin olur.

Uşaqların özünə də demişəm ki, biz hələ istədiyim futbolu oynamağa tam hazır deyilik. İlk növbədə də fiziki hazırlıq ürəyim istəyən kimi deyil. Qol vəziyyətlərindən yararlanmaqda problemlərimiz var. Amma qol vuracağımıza inanırdıq. Belə olmasaydı son dəqiqələrdə fərqlənə bilməzdik".