Nicat Qurbanov: Neftçi rəhbərliyi komandanın uğuruna inanır
"Neftçi"nin yarımmüdafiəçisi Nicat Qurbanov Avropa Liqasının birinci təsnifat mərhələsi çərçivəsində Çernoqoriya "Mladost"u ilə cavab oyunu öncəsi azerisport.az saytının suallarını cavablandırıb.
- Doğma meydanda 2:2 hesablı heç-heçə pley-off qarşılaşmaları üçün heç də uğurlu nəticə sayılmır. "Neftçi" səfərdə hansı nəticəyə ümidlidir?
- Bu, futboldur. Kim yaxşı oynasa, ələ düşən şanslardan maksimum yararlansa, növbəti mərhələyə də o yüksələcək.
- Artıq "Mladost"u daha yaxşı tanıyırsınız. Bu komandanı nəyin sayəsində keçmək olar?
- Cavab matçına ciddi hazırlaşmışıq. "Mladost"u keçmək üçün sadəcə, qələbə qazanmağımız lazımdır. Vəssalam!
- İlk oyunda buna nail olmağınıza nə mane oldu?
- Komandamız yaxşı təsir bağışladı. Heyətin yenidən formalaşdığını, gənclərin üstünlük təşkil etdiyini nəzərə alsaq, ilk matçın nəticəsi başadüşüləndir. Komandaya inanmaq lazımdır.
- Qələbə qazanmağınıza nə mane oldu?
- Çox təəssüf ki, matçın sonunda qol buraxdıq. Uşaqlar qələbə qazanmaq üçün çox çalışdılar. Allah eləsin ki, buna cavab görüşündə nail olaq.
- "Neftçi" iki qol vursa da, hücumda çox dişsiz görünürdü. Qollar da daha çox təsadüf və fərdi ustalıq sayəsində vuruldu...
- Mən belə deməzdim. Komanda iki qol vurursa, onun hücum xəttini dişsiz adlandırmaq olmaz. Məhəmməd Qurbanov yenidir. Onun sözünü deyəcəyinə inanıram.
- Klub rəhbərliyi ilk oyundan sonra sizə nə dedi?
- Bizə inandıqlarını söylədilər. Cavab matçında uğur qazanacağımıza ümidli olduqlarını söylədilər. Onlar gənc futbolçulara əlavə motivasiya qazandırdılar. Bu da bizi sevindirməyə bilməz.
- Razısınız ki, "Mladost" gözləniləndən zəif komandadır?
- Heç kimi aşağılamaq istəməzdim. Hər bir rəqibimizə hörmətlə yanaşırıq. Onlar bu gün Avropa Liqasında çıxış edirlərsə, deməli, yaxşı komandadırlar. Həmçinin məğlubedilməz komanda da yoxdur.
- "Neftçi" Avroliqada nə qədər uzağa gedə bilər? Ya əsas hədəfiniz yalnız "Mladost"a qalib gəlməkdir?
- Bu mərhələni keçmək üçün əlimizdən gələni edəcəyik. Komandamıza inanırıq.
