Vaqif Sadıqov: Ən azı Qəbələ və İnterin mərhələ keçəcəyini düşünürəm
AFFA Məşqçilər Komitəsinin sədri Vaqif Sadıqov Avropa Liqasının birinci təsnifat mərhələsindəki təmsilçilərimizin şanslarını dəyərləndirib. Azerisport.az saytına açıqlamasında o, bunları söyləyib:
"Klublarımızın hər biri növbəti mərhələyə həm adlaya, həm də mübarizədən kənarda qala bilər. "Qəbələ" və "İnter"in cavab görüşünü evdə keçirdiyini nəzərə alsaq, onların şansları daha qənaətbəxşdir. Bakılılar Albaniya "Laçi"si ilə səfər oyununda sərfəli nəticəyə nail olub (1:1). Fikrimcə, bu komanda öz meydanında uğurlu çıxışını davam etdirib, mərhələ adlayacaq. İlk oyunda uduzmasına baxmayaraq (1:2), "Qəbələ" də bu heyətlə yəqin ki, uğur qazanacaq. "Dinamo" ilə oyunda bu komandadan hamımız qələbə gözləyirik. "Neftçi"yə gəlincə, hər şey komandamızın öz əlindədir. Baxmayaraq ki, ilk oyunun nəticəsi (2:2) Çernoqoriya "Mladost"unun şansının daha çox olduğunu deməyə əsas verir. Cavab matçı da bərabər səviyyədə keçəcək. Bu üzdən də öz şanslarından daha yaxşı yararlanacaq komanda mərhələ adlayacaq. Mənim proqnozuma gəlincə, ən azı "İnter"lə "Qəbələ"nin növbəti mərhələyə çıxacağını düşünürəm".
