Marko Şçepanoviç: Bakıda 2-ci qolu buraxanda daha ikisini buraxacağımızı düşündüm

Çernoqoriyanın "Mladost" klubunun hücumçusu Marko Şçepanoviç Avropa Liqasının birinci təsnifat mərhələsi çərçivəsində "Neftçi"yə qarşı keçirəcəkləri cavab matçı öncəsi fikirlərini açıqlayıb. Azerisport.az xəbər verir ki, o, öncə bunları söyləyib:

"Bakıda olan hər kəs stadiondakı atmosferi gördü və hiss etdi ki, rəqibimiz Azərbaycanın ən böyük klublarından hesab olunur. Cavab matçının da ağır keçəcəyini düşünürəm. Çünki rəqibin ilk oyunda 2:2 hesabından çox narazı qaldığı aydındır. Lakin biz növbəti mərhələyə vəsiqə qazanmaq üçün cavab görüşündə də özümüzü yaxşı tərəfdən göstərməliyik.

Biz növbəti mərhələyə ancaq azarkeşlərimizin dəstəyi sayəsində adlaya bilərik. Buna görə onların arenaya gəlib bizi dəstəkləməsi lazımdır. Ümid edirəm ki, podqoritsalıların çoxu bizi dəstəkləməyə gələcək, tribunaları doldurmağa çalışacaq. Çünki uğur qazanmaq üçün çox yaxşı şans əldə etmişik. Bu şansı azarkeşlərimizlə birgə dəyərləndirməliyik.

Bakıdakı oyunda "Neftçi" ikinci qolu vuranda stadionda elə bir sevinc var idi ki, biz hətta daha iki qol buraxacağımızı düşünürdük. Amma xoşbəxtlikdən soyuq başla oyunu davam etdirə bildik və hesabı bərabərləşdirməyə nail olduq. 2:2 hesabı bizi cavab oyununda sakit oynamağa çağırır. Rəqibdən fərqli, bizi yalnız qələbə düşündürmür. Hətta qolsuz heç-heçə və ya 1:1 hesabı da bizi növbəti mərhələyə çıxaracaq. Baxmayaraq ki, yalnız hesabı qorumağa çalışmaq da düzgün deyil. Lakin nə qədər ki, hesab açılmayıb, biz "Neftçi"dən daha şanslıyıq".