Ruslan Qurbanov: Mladostun ev oyununda hücuma atılacağını düşünmürəm

"Neftçi"nin hücumçusu Ruslan Qurbanovun Avropa Liqasının birinci təsnifat mərhələsi çərçivəsində Çernoqoriya "Mladost"u ilə cavab oyunu öncəsi azerisport.az saytına müsahibəsi

- Cavab oyunundakı şanslarınızı necə qiymətləndirə bilərsiniz? Yəqin ki, "Mladost" evdə Bakıdakı kimi oynamayacaq...
- Elədir. Onların hücuma çox aludə olacağını düşünmürəm. Amma hələ də şansların bərabər olduğunu hesab edirəm. Hətta biz bu dəfə səfərdə oynasaq da. Bizə qələbə qazanmaq çox vacibdir.

- Hazırlıq necə keçib?
- Tam gücümüzlə məşq etmişik. Hamımız gözəl başa düşürük ki, bizdən ancaq müsbət nəticə gözlənilir. Biz də buna nail olmaq istəyirik ki, hamı razı qalsın.

- İlk oyunda qələbəni əldən verməyiniz məyusluq yaratmır?
- Əlbəttə, məyusluq var. Bu, psixoloji baxımdan da təsirini göstərir. Amma futbol belədir. Təəssüf ki, oyunun sonunda qol buraxdıq. Cavab oyununda qələbə qazanmaq üçün əlimizdən gələni etməliyik.

- "Neftçi"nin qələbəsinə nə çatmadı?
- Fikrimcə, normal oynadıq. Özü də heyətin əksəriyyəti yerli uşaqlar idi. Sadəcə, oyun təcrübəsinin azlığı sözünü dedi. Bəzi uşaqların ümumiyyətlə avrokubok təcrübəsi yox idi.

- Geridə qalan müddətdə həmin çatışmazlıqları aradan qaldırmaq mümkün olmamışdı...
- Çünki hazırlıq üçün çox az vaxtımız var idi. Amma biz özümüzə inanırıq. Cavab oyununda da qələbəyə oynayacağıq.

- Hazırda komandada bir mərkəz hücumçusu - Məhəmməd Qurbanov var. Siz adətən, sağ cinahda oynayırdınız. Amma ilk oyunda hücumun sivri ucunda sizi gördük...
- Şəxsən mənim üçün bunun ciddi fərqi yoxdur. Baş məşqçinin qoyduğu istənilən mövqedə oynamağa hazıram. Əlbəttə, bir qədər alışmadığım mövqe idi. Çünki mən daha çox cinahda oynayırdım. Buna baxmayaraq, çalışdım. Məhəmmədə isə vaxt lazımdır. Bu, onun hələ debüt oyunu idi.