Dodo: Biz gürcü fanatlara yalnız qələbəmizlə cavab verə bilərik
"Qəbələ"nin yarımmüdafiəçisi Dodo Avropa Liqasının birinci təsnifat mərhələsi çərçivəsində Gürcüstan "Dinamo"suna (Tiflis) qarşı keçirəcəkləri cavab matçı öncəsi azerisport.az saytının suallarını cavablandırıb.
- "Qəbələ"nin Tiflisdəki məğlubiyyətinə nə səbəb oldu?
- Bizim yaxşı və güclü komandamız var. Mümkündür ki, komandada baş verən son dəyişikliklərin təsiri oldu. Daha yaxşı oynamağımız üçün zaman lazımdır. Özümüz də xeyli səhvə yol verdik. Elə birinci hissədə öz imkanlarımızdan maksimum istifadə etsəydik, hər şey tam fərqli olacaqdı. Hər halda qarşıda cavab oyunu da var və vəziyyəti xeyrimizə dəyişmək şansımız qalır.
- Məğlubiyyət komandaya təsir etmədi?
- Xeyr. Biz optimistliyimizi qoruyuruq. Yaxşı şansımız var.
- Gürcü azarkeşlərin Azərbaycan bayrağına, "Qəbələ"nin atributlarına, azarkeşlərinizə qarşı hərəkətlərini necə qəbul etdiniz?
- Artıq beş ildir Azərbaycanda yaşayıram və özümü bir azərbaycanlı kimi hiss edirəm. Bu ölkənin hər bir vətəndaşı kimi, mənə də orada gördüklərim qətiyyən xoş olmadı.
- Sizcə, onların bu hərəkətinə necə cavab vermək lazımdır?
- Biz onların bu davranışlarına ancaq öz qələbəmizlə cavab verməliyik. Bundan yaxşı heç nə düşünmək olmaz. Həm də biz mübarizəni ilk təsnifat mərhələsində dayandıra bilmərik.
- "Qəbələ"dən cavab oyununda nə gözləyək?
- Gürcüstan klubunu keçmək üçün yaxşı şansımız var. Sadəcə, qələbə qazanmaq lazımdır. Biz bunu bacaracaq gücdəyik. Meydanda xarakter nümayiş etdirməliyik. Birinci oyunla müqayisədə daha yaxşı çıxış etməliyik.
- Bəs ardıcıl ikinci mövsümdə də heç nə alınmasa, onda necə olacaq?
- Bu barədə heç danışmaq, düşünmək də istəmirəm. Mənim beynimdə ancaq bir şey var - qələbə!
