GFF prezidenti Azərbaycan bayrağını təhqir edənləri tapmağa söz verdi

AFFA-nın baş katibi Elxan Məmmədov Gürcüstan Futbol Federasiyasının prezidenti Zviad Siçinava ilə telefonla əlaqə saxlayıb. Azerisport.az xəbər verir ki, onlar Avropa Liqasının birinci təsnifat mərhələsi çərçivəsində Tiflis "Dinamo"su ilə "Qəbələ" arasında keçirilmiş ilk oyunda baş verən olayları müzakirə ediblər.

Qeyd edək ki, matçdan öncə gürcü fanatlar Azərbaycandan gedən azarkeşlərə hücum ediblər, onların əllərindəki bayraq və plakatları alıblar. Matç zamanı isə özləri qalmaqallı plakatlar açıblar. Hətta "Qəbələ"nin və Azərbaycan bayrağını ayaqlar altına ataraq, şəkillərini çəkib, sosial şəbəkələrdə paylaşıblar.

Siçinava Məmmədova söz verib ki, bu problemlə yaxından maraqlanacaq və günahkarların tapılması üçün əlindən gələni edəcək.