Roman Qriqorçuk: Səfər matçında qol vurmuşuq, növbəti mərhələ haqda düşünə bilərik
"Qəbələ"nin baş məşqçisi Roman Qriqorçuk Avropa Liqasının birinci təsnifat mərhələsi çərçivəsində Gürcüstanın "Dinamo" (Tiflis) klubuna qarşı keçirdikləri ilk oyundan (1:2) sonra jurnalistlərin suallarını cavablandırıb. Azerisport.az sizi ukraynalı mütəxəssisin fikirləri ilə tanış edir.
- Azlıqda qalan komandadan necə iki qol buraxmaq olar?
- Bu, hokkey yox, futboldur. Qolları əks-hücumda, fərdi səhvlər nəticəsində buraxdıq. "Dinamo" düzgün oynadı.
- Növbəti mərhələyə adlamağa ümidiniz var? Dodo ilə Rəşad Sadiqovu meydana buraxmaqda gecikdiyinizi düşünmürsünüz?
- Oyunun gedişatını dəyişmək üçün ələ düşən şanslardan yararlanmaq istəyirdik. Dodonu buraxdım ki, cinah hücumlarımızın kəsərini artıraq. Əvəzetmələrdə gecikdiyimizi düşünmürəm. Dodo uzun müddət idi oynamırdı. Ona görə düşündüm ki, çox oynaya bilməz. Digər sualınıza gəlincə, növbəti mərhələyə adlamaq barədə düşünürük. Çünki səfərdə qol vurmuşuq.
- Şansları necə dəyərləndirərdiniz?
- Dəqiq deyə bilmərəm, amma şans var. Cavab oyununda daha yaxşı oynamağımız lazımdır. Səhvlər olur, sadəcə, onları təkrarlamamaq lazımdır.
- Bir həftə bu səhvləri aradan qaldırmağa yetəcək?
- Müdafiədə bu qədər səhvlərə yol verməyimizi xatırlamıram. Sonuncu qolu öz səhvimizdən buraxdıq. Bu, izahı olmayan bir səhv idi. Yəqin ki, bu gün bizim günümüz deyildi.
- 10 gənc futbolçuya uduzmaq nə dərəcədə üzücüdür?
- Artıq səhvlər barədə danışdım. 15 nəfərlə oynayarkən də qol buraxmaq olar. Bizim də qol vəziyyətlərimiz çox idi. Sadəcə, yararlana bilmədik.
- Ruslan Abışova layiqli əvəzləyici tapa bilməmisiniz?
- Abışova hörmətim var. Düzdür, müdafiəçilərimiz səhvlərə yol verdilər. Amma onların pis oyunçu olduqlarını deməzdim.
- Avqustun 11-də Tiflisdə keçiriləcək UEFA Super Kubokunu izləməyə gələcksiniz?
- Dəvətinizə görə təşəkkürümü bildirirəm. Amam mən öz avrokubok matçımıza hazırlaşacağam.
- "Qəbələ" bir həftə sonra "Dinamo"ya qalib gələ biləcək?
- Yeni komandanı formalaşdırmaq, yaxşı futbol sərgiləmək üçün vaxt lazımdır. Daha çox oyun keçirmək lazımdır.
