Aryan Şeta: Favorit İnterdir, amma Laçi sürpriz edə bilər

Albaniyanın "Laçi" klubunun müdafiəçisi Aryan Şeta Avropa Liqasının birinci təsnifat mərhələsi çərçivəsində Bakı "İnter"inə qarşı keçirəcəkləri oyun öncəsi bir sıra suallara cavab verib. Azerisport.az sizi həmin fikirlərlə tanış edir:

- Bizim hədəfimiz növbəti mərhələyə çıxmaqdır. Amma bu, heç də asan olmayacaq. Bunun üçün bəxt də bizim tərəfimizdə olmalıdır.

- Komandanız oyuna necə hazırlaşa bilib?
- İki həftə toplanış keçdik. Həmin müddətdə çox intensiv məşq etdik ki, yaxşı forma toplayaq. Bizi təcrübəli komanda ilə görüş gözləsə də, kollektiv olaraq sakitik. İstənilən rəqibə qarşı mübarizə apara bilərik. Uğur qazanmaq istəyirik.

- İlk oyun öncəsi heyətdə itkilər var?
- Yayın əvvəlində bu baxımdan işlərimiz qaydasında deyildi. Bir sıra aparıcı futbolçularımız komandanı tərk etdi. Bəziləri isə zədəsini sağaltmaqla məşğuldur. Ona görə bu oyunda "İnter" favorit hesab oluna bilər.

- Bu, psixoloji baxımdan sizə mənfi təsir etmir?
- Rəqibin bizdən daha yüksəkdə durduğunu bilirik. Azərbaycanlıların avrokubok təcrübəsi bizdən daha çoxdur. Amma hər şeyə iki oyunun nəticəsində aydınlıq gələcək. Rəqibin favorit sayılması bizə təsir etməməlidir. Əksinə, bu, "İnter" üzərində təzyiq yaradacaq, biz isə öz oyunumuzu sərgiləməyə çalışacağıq. Sizi əmin edirəm ki, "Laçi" Avropa Liqasında sürpriz edə biləcək.

- İlk matçın doğma meydanda keçirilməsi sizə nə dərəcədə təsir edə bilər?
- Fikrimcə, biz hər iki oyunda maksimum güc qoymağa borcluyuq. Ola bilər ki, ilk oyunda oyunumuz alınmasın, amma cavab görüşündə yaxşı çıxış edək. Fikrimcə, ilk qarşılaşmada müsbət nəticəyə nail olsaq, Bakıdakı görüşdə növbəti mərhələyə adlamaq üçün real şansımız olacaq.