Qəbələ Gürcüstana yola düşdü
UEFA Avropa Liqasının I təsnifat mərhələsində çıxış edəcək “Qəbələ” bu gün Gürcüstana yollanıb. Azerisport.az xəbər verir ki, iyulun 2-də Tiflisin “Dinamo” klubu ilə ilk matçına çıxacaq “qırmızı-qaralar” oyundan iki gün əvvəl qonşu ölkəyə gedib.
Roman Qriqorçukun baş məşqçisi olduğu komanda səhər məşqindən sonra səfərə çıxıb. 2015/16 mövsümünün hazırlıq məqsədilə iyunun 10-19-da Türkiyənin Ərzurum şəhərində, 20-30-da Qəbələdə toplanış keçən komandamız UEFA Avropa Liqasının I təsnifat mərhələsinin ilk oyunu öncəsi son məşqini Tiflisdə keçirəcək.
“Qəbələ” I təsnifat mərhələsində iştirak etmək üçün 27 futbolçunu sifariş vərəqinə daxil edib. Komanda Gürcüstana da bu heyətlə yollanıb:
Qapıçılar: 1. Andrey Popoviç, 22. Dmitri Bezotosnı, 30. Anar Nəzirov, 36. Süleyman Süleymanov;
Müdafiəçilər: 3. Voyislav Stankoviç, 7. Ruslan Əmircanov, 8. Məhəmməd Mirzəbəyov, 13. Murad Musayev, 15. Vitali Vernidub, 20. Rikardinyo, 21. Arif Daşdəmirov, 34. Ürfan Abbasov, 44. Rafael Santos.
Yarımmüdafiəçilər: 4. Elvin Camalov, 5. Georgi Floresku, 6. Rəşad Sadiqov, 11. Asif Məmmədov, 14. Cavid Hüseynov, 16. Emin Zamanov, 17. Qismət Alıyev, 19. Aleksey Qay, 66. Samir Zərgərov, 67. Sahil Mirzəyev;
Hücumçular: 9. Sergey Zenyov, 10. Dodo, 69. Aleksey Antonov, 97. Roman Hüseynov.
Bu, komandanın mövsümdə ilk rəsmi matçı olacaq. Avrokuboklarda ötən il debüt edən “Qəbələ” qitəmiqyaslı turnirdəki 2-ci cəhdində mərhələ adlamağa çalışacaq. Bunun üçün isə komanda bir həftə sonra Qəbələdə baş tutacaq matç öncəsi səfərdə sərfəli nəticə qazanmalıdır.
Tiflisdəki matç əfsanəvi Boris Payçadzenin adını daşıyan “Dinamo Arena”da baş tutacaq. Görüşü israilli hakimlər idarə edəcək.
UEFA Avropa Liqası, I təsnifat mərhələsi
İlk oyun, 2 iyul
21:00. “Dinamo” (Tiflis, Gürcüstan) – “Qəbələ”
Baş hakim: Roi Reynşreyber (İsrail)
Baş hakimin köməkçiləri: David Elias Biton, İdan Yarkoni (hər ikisi İsrail)
Ehtiyat hakim: Zvi Levi (İsrail)
UEFA nümayəndəsi: George Fantaros (Yunanıstan)
Hakim-inspektor: Siril Zimmermann (İsveçrə)
Tiflis. Boris Payçadze adına “Dinamo Arena” stadionu.
