Elvin Bədəlov: Mladost yaxşı komandadır, amma Neftçinin dişinə görə rəqibdir
"Neftçi"nin müdafiəçisi Elvin Bədəlovun azerisport.az saytına müsahibəsi
- Ötən gün Ukraynanın "Şaxtyor" klubuna qarşı keçirdiyiniz son yoxlama oyunu ilə Avstriya toplanışını başa vurdunuz. Donetsk təmsilçisi ilə oyun barədə nə deyə bilərsiniz?
- Yaxşı oynadıq. Çətin olacağını bilirdik. Fikrimcə, Çernoqoriya "Mladost"u ilə rəsmi oyun öncəsi "Şaxtyor"la qarşılaşma yaxşı hazırlıq oldu. Donetsk klubu ilə görüş zəif və güclü cəhətlərimizi üzə çıxarmağa imkan verdi. Ümid edirəm ki, Avropa Liqasındakı ilk oyunumuza qədər tam hazır olacağıq.
- Amma "Neftçi" "Şaxtyor"dan öncə Macarıstanın MTK (0:3) və Albaniyanın "Kukesi" (0:2) klublarına da qol vura bilmədən uduzdu…
- Biz bu oyunlarda nəticəyə oynamırdıq. Bizim hədəfimiz öz səhvlərimizi görmək idi ki, məşq prosesində onları aradan qaldıraq. Məsələn, "Kukesi"yə qarşı MTK ilə görüşlə müqayisədə daha yaxşı oynadıq. Yəni oyundan oyuna daha yaxşı təsir bağışlayırdıq. İnanıram ki, hər şey yaxşı olacaq və biz öz oyunumuzu tapacağıq.
- Bütövlükdə, hazırlığı necə qiymətləndirərdiniz?
- Məşqlərimiz plana uyğun gedir. Avroliqaya ciddi hazırlaşırıq. Komandada atmosfer əladır.
- "Neftçi" Avroliqanın startına qədər tam hazır olacaq?
- Avroliqanın startına hələ vaxt var. Fikrimcə, tam hazır ola biləcəyik.
- Komandanızın Avroliqa üçün hədəfi nədir?
- Mümkün qədər çox irəli getmək. Eyni zamanda baxımlı futbol göstərmək istəyirik.
- "Mladost" haqda nə bilirsiniz?
- Yaxşı komandadır. Hələ onların oyunlarının videoyazısına da baxmalıyıq. Hesab edirəm ki, "Mladost" dişimizə görə rəqibdir. Onları keçə bilərik.
- Rəqib komandanın üzvlərindən kimisə tanıyırsınız?
- Xeyr, heç kimi. Oyunlarda tanış olarıq.
- "Neftçi"nin gəncləşdirmə siyasəti siz və sizin kimi digər gənclər üçün bir şansdır...
- Heyətdə bu qədər gənc futbolçuya yer verilməsi çox yaxşıdır. Bu, doğrudan da bizim üçün bir şansdır. Həm də komandada təcrübəli futbolçular var. Fikrimcə, gənclərlə təcrübəlilərin sintezindən yaxşı bir komanda formalaşdıracağıq.
