Slavço Georgiyevski: Laçi səddini keçə bilməsək, faciə olacaq

"İnter"in yarımmüdafiəçisi Slavço Georgiyevskinin azerisport.az saytına müsahibəsi

- "Qəbələ"yə qarşı yoxlama oyunu barədə nə deyə bilərsiniz?
- İlk oyunumuzu keçirməyimizə baxmayaraq, komanda pis təsir bağışlamadı. Heyətimiz hələ tam komplektləşməyib. Çox çalışmağımız lazımdır. Yeni futbolçuların komandaya uyğunlaşması lazımdır. Fikrimcə, hər şey zamanla yaxşı olacaq.

- Amma bunun üçün elə də çox vaxtınız yoxdur. Çünki növbəti həftə sizi Avropa Liqası çərçivəsində Albaniyanın "Laçi" klubu ilə ilk oyun gözləyir...
- Hazır olmalıyıq. Avrokubokların startı ərəfəsində biz daha bir yoxlama görüşü keçirəcəyik. Hər şey yaxşı olacaq. Buna görə narahat deyilik. "Qəbələ" ilə oyun da göstərdi ki, hər şey yaxşı olacaq.

- "Laçi" barədə nə bilirsiniz?
- Tədricən informasiya toplayırıq. Yaxşı və möhkəm komandadır. Güclü ifaçıları var.

- Şanslar necədir?
- Bizim öz hədəflərimiz var. Rəqibə hörmət edirik, amma özümüzə də. Bu üzdən də bir hədəfimiz var - qələbə qazanmaq.

- "İnter"i favorit saymaq olar?
- Gəlin favorit axtarmayaq. Biz öz səviyyəmizi göstərməliyik. Asan olmayacaq. Amma yaxşı futbolçularımız var. Yeganə çatışmazlığımız gec toplaşmağımızdır. Lakin bu da uğursuz çıxış etməyimizə bəhanə olmamalıdır.

- Yəqin ki, "Neftçi"nin Albaniyanın "Şkenderbeu" klubuna məğlubiyyətini unutmamısınız. "İnter"in də oxşar uğursuzluqla üzləşəcəyindən qorxmursunuz?
- Biz "Laçi"yə zəif rəqib gözü ilə baxmırıq. Şanslar bərabərdir.

- Komanda nə dərəcədə güclənə bilib?
- "İnter" transfer bazarında yaxşı iş gördü. Rauf Əliyev, Yuri Fomenko, Mirhüseyn Seyidov, Denis Silva və digər yeni futbolçularımız çox ciddi transferlərdir. Bundan sonra yalnız meydanda anlaşma səviyyəsini yaxşılaşdırmaq qalır.

- "Laçi" səddini keçə bilməmək faciə olacaq?
- Əlbəttə, faciə olacaq. Son illərdə biz öz səviyyəmizi yüksəyə qaldıra bilmişik. İndi həmin səviyyənin aşağı enməsinə imkan verməməliyik. İlk mərhələni keçmək lazımdır.