Qequçadze: İlk matçı evdə keçirməyimizin həm mənfi, həm də müsbət cəhətləri var

Gürcüstanın "Dinamo" (Tiflis) klubunun baş məşqçisi Qiya Qequçadzenin azerisport.az saytına müsahibəsi

- Püşk Avropa Liqasının birinci təsnifat mərhələsində sizə "Qəbələ"ni çıxaranda reaksiyanız necə oldu?
- Normal. Püşklə hesablaşırıq. Meydana çıxıb öz oyunumuzu sərgiləməyə hazırlaşırıq.

- Rəqib barədə nə məlumat əldə edə bilmisiniz?
- Bilirəm ki, layiqli komandadır. Bu da təəccüblü deyil. Çünki Azərbaycan futbol ölkəsidir. Azərbaycan çempionatının üçüncüsü zəif komanda ola bilməz. Xüsusilə, mövsümün ikinci hissəsində onlar çox uğurlu çıxış ediblər, çempionatı mükafatçılar sırasında bitiriblər. Kifayət qədər yaxşı komandadır. Sanballı transferlər də ediblər. Bizi çox yaxşı komanda gözləyir.

- Ölkəmizdə əksəriyyət belə düşünür ki, "Qəbələ" "Dinamo"nu keçməyə borcludur. Bəs siz necə düşünürsünüz?
- Bu, onların haqqıdır. Amma nəyin necə nəticələnəcəyini demək çətindir. Bizi iki oyun gözləyir. Öncədən nəsə deməyin mənası yoxdur.

- İlk oyunun Tiflisdə keçirilməsi rəqibin xeyrinədir?
- Bunun həm mənfi, həm də müsbət cəhətləri var. Birmənalı olaraq hər şeyin rəqibin xeyrinə demək olmaz. İstənilən halda hər iki komanda oxşar şərtlər altında oynayacaqlar.

- Azərbaycan və Gürcüstan klublarının avrokuboklardakı son iki qarşılaşmasında bizim klublar üstün olublar. "Dinamo" həmin məğlubiyyətlərin qisasını almaq barədə düşünməyəcək?
- Hansısa revanş hissindən danışmaq düzgün olmaz. Biz sadəcə, meydana çıxıb, qələbə qazanmağa çalışacağıq.

- Avropanın elə də varlı olmayan klubları həmişə Azərbaycan təmsilçilərinin imkanlı olmasını qabardır...
- Belə söhbətlər istisnadır. Kimin nə qədər qazandığına, kimdə necə şərait olmasına qətiyyən fikir vermirəm. Mən öz komandama cavabdehəm. Bizim kifayət qədər gənc futbolçumuz var. Onlar futbol oynamağı çox sevirlər. Avrokuboklar bizim üçün böyük şansdır.

- Proqnoz verə bilərsiniz?
- Proqnoz vermək elə də yaxşı iş deyil. Bərabər şərtlər altında başlayırıqsa, deməli, şanslar da əllinin əlliyədir.