Samir Zərgərov: Hədəfimiz Avroliqanın qrupunda oynamaqdır

"Qəbələ"nin yarımmüdafiəçisii Samir Zərgərovun azerisport.az saytına müsahibəsi

- Avropa Liqasının birinci təsnifat mərhələsindəki rəqibiniz - Tiflis "Dinamo"su (Gürcüstan) barədə nə deyə bilərsiniz?
- "Dinamo"ya qarşı iki dəfə oynamışam. Bir dəfə "İnter"in, digərində "Simurq"un heyətində. Həmin oyunlar yoxlama xarakteri daşıyırdı. Hər iki görüşdə Gürcüstan klubu yaxşı təsir bağışlamışdı. Bütövlükdə, "Dinamo"nun zəngin tarixi var. Onları çox yaxşı analiz etməliyik.

- Bu komandanı keçə biləcəksiniz?
- Gürcüstanın futbol məktəbi həmişə güclü olub. Bu üzdən də biz qarşı oyunlara ən yaxşı formada köklənməliyik. Çox ümid edirəm ki, sonda sevinən tərəf məhz biz olacağıq.

- Bəs avrokuboklardakı əsas hədəfiniz nədən ibarətdir?
- Hədəfimiz qrup mərhələsində oynamaqdır.

- Türkiyə toplanışı komanda üçün nə dərəcədə faydalı oldu?
- Hər şey yaxşı alındı. Baş məşqçinin öz taktikası var və hər birimiz Roman Qriqorçukun tələblərini yerinə yetirməyə çalışırıq.

- Artıq komandaya uyğunlaşa bilmisiniz?
- Burada çoxdan tanıdığım uşaqlar çoxdur. Rəhbərliyi də tanıyıram. Təkcə baş məşqçi ilə tanış deyildik.

- Keçmiş klubunuz "Simurq" heç də yaxşı günlərini keçirmir. Onlarla maraqlanırsınız?
- Daim maraqlanıram. Klubda çalışanlarla əlaqə saxlayıram. "Simurq"un düşdüyü bu vəziyyət məni çox məyus edir. Çox yaxşı komandadır. İstənilən futbolçu üçün tramplindir. Onlar çıxışını davam etdirsə, çox sevinərəm.