Mario Nikoli: Şkenderbeu Neftçini keçdiyi kimi, biz də İnteri təəccübləndirə bilərik
Albaniyanın "Laçi" klubunun baş meneceri Mario Nikolinin azerisport.az saytına müsahibəsi
- Düzünü deyim ki, bu mərhələdə daha asan rəqiblə qarşılaşacağımızı gözləyirdim. Deyə bilərəm ki, püşkatmada bəxtimiz elə də gətirmədi. Amma istənilən halda sonadək mübarizə aparacağıq.
- "İnter" barədə nə bilirsiniz?
- Bu, böyük komandadır. Amma biz əlimizdən gələni edəcəyik ki, mərhələ adlayaq. Biz rəqibdən qorxmuruq. Futbol sürprizləri sevir. Bunun dəfələrlə şahidi olmuşuq.
- "Şkenderbeu"nun "Neftçi"yə qalib gəlməsini nəzərdə tutursunuz?
- Bu da bir nümunədir. Biz də "İnter"i təəccübləndirə bilərik. Bizim gənc və iddialı komandamız var.
- Favorit "İnter"dir?
- Şübhəsiz.
- Bakılıların hazırda maliyyə çətinlikləri ilə üzləşdiyindən xəbəriniz var?
- Fikrimcə, bu, elə də vacib deyil. Maliyyə məsələsi bizim "İnter"lə duellərimizdə heç nəyi həll etməyəcək. Çünki avrokubok matçına çıxan futbolçu qalan hər şeyi ikinci plana atır. Fikrimcə, "İnter" Avropa Liqasında uğur qazanmaq üçün maksimum güc sərf edəcək.
