Levan Zuhbaya: Azərbaycan klubları gürcüləri ona görə məğlub edirlər ki, Dinamo ilə qarşılaşmırlar

Gürcüstanın "Dinamo" (Tiflis) klubunun idman direktoru Levan Zuhbayanın azerisport.az saytına müsahibəsi

- Avroliqanın birinci təsnifat mərhələsi çərçivəsində "Qəbələ"yə rəqib oldunuz. İlkin təəssüratlarınız maraqlıdır...
- Futbol meydançasında qonşu ölkə təmsilçisi ilə qarşılaşmaq hər zaman maraqlıdır. Azərbaycanla yaxşı münasibətimiz var. Amma futbol futboldur. Komandamız özünü yaxşı tərəfdən göstərməyə çalışacaq. Şübhəm yoxdur ki, "Qəbələ" də özünü göstərməyə çalışacaq.

- "Qəbələ" ilə düşəndə reaksiyanız necə oldu?
- Sakit qarşıladım. Kimin düşməsindən asılı olmayaraq, oynamağa hazır idik.

- "Dinamo"nu cütün favoriti saymaq olar?
- Gəlin başqa cür cavab verim. Mən bir "Dinamo" rəsmisi kimi komandamızı, "Qəbələ"də çalışanlar isə öz komandalarını favorit hesab edirlər.

- Azərbaycan komandaları son illərdə Gürcüstan klublarına qalib gəlir. İki ölkənin klub futbolunu necə müqayisə edərdiniz?
- Azərbaycan klubları bizim komandalarımıza ona görə qalib gəlirdilər ki, "Dinamo" ilə qarşılaşmırdılar.

- İlk oyunu evdə keçirməyinizi necə qarşıladınız?
- Adətən ilk oyunu səfərdə keçirmək üstünlük yaradır. Amma püşkün nəticəsinə görə ilk oyunu Tiflisdə keçirməliyik. Fikrimcə, bu, bizə problem yaratmamalıdır.

- Necə düşünürsünüz, "Qəbələ" ilə oyun azarkeşlərinizin diqqətini çəkəcək?
- Mütləq. Şübhə etmirəm ki, bu oyunlara çoxlu azarkeş toplaşacaq.

- "Qəbələ" barədə nə bilirsiniz?
- Bu klub barədə müəyyən məlumatım var. Amma istənilən halda bizim öz hədəflərimiz var - mümkün qədər çox mərhələ adlamaq istəyirik.