Rudarın prezidenti: Qarabağ bizə qonaq gəlməklə təəccüblənəcək

Çernoqoriyanın "Rudar" klubunun prezidenti Boyan Tanyeviçin azerisport.az saytına müsahibəsi

- ÇL-in ikinci təsnifat mərhələsində "Qarabağ"la qarşılaşacaqsınız. Püşkatma ilə bağlı nə deyə bilərsiniz?
- İlk növbədə onu qeyd etmək istərdim ki, bu oyunlar iki dost ölkənin təmsilçilərinin görüşü olacaq. Azərbaycanla Çernoqoriya çox isti münasibətlərə malikdir. Amma düzünü desəm, bizim üçün Balkan komandaları ilə qarşılaşmaq daha asan olardı. "Qarabağ"la səfər oyununa yollanmaq xeyli vaxt alacaq. Amma hər iki komanda üçün şərtlər eyni olacaq. Ona görə də heç kim səbəb axtarmayacaq.

- "Qarabağ" haqda nə bilirsiniz?
- Bu klubun ötən mövsüm Avropa Liqasının qrup mərhələsində çıxış etməsindən xəbərimiz var. Amma bu, bizi qorxutmur. İndiki zamanda zəif rəqib yoxdur. Özümüzə inanırıq.

- "Rudar"ın indiki vəziyyəti bu komandaların ifasında yaxşı mübarizə izləyəcəyimizə ümid verir?
- "Qarabağ"ı deyə bilmərəm, amma biz artıq hazırlaşırıq. Yeni oyunçular almışıq. Yaxşı heyətimiz var.

- Cütün favoriti hansı komandadır?
- Məşqçi olsaydım, birmənalı şəkildə "Qarabağ"ın adını çəkərdim. Amma "Rudar"ın prezidenti kimi deməliyəm ki, favorit bizik (gülür). Fikrimcə, hər iki komandanın şansı eynidir.

- İlk matçın Bakıda keçirilməsi sizi sevindirdi?
- Bunun heç bir önəmi yoxdur. Hər iki komanda bir oyunu evdə, digərini səfərdə keçirəcək.

- Ağdamlıları harada qəbul edəcəksiniz?
- Təəssüf ki, şəhərimizdə aeroport yoxdur. Ona görə də rəqiblərimizi Petrovatsda qəbul edirik. Fikrimcə, "Qarabağ" bizə qonaq gəlməklə təəccüblənəcək. Petrovaç gözəl turist şəhəridir.