Rauf Əliyev: Sərfəli təklif alan kimi, İnterdən gedəcəyəm
"İnter"in yeni transferi Rauf Əliyevin azerisport.az saytına müsahibəsi
- Sizin hansısa xarici klublardan birinə keçəcəyinizi gözləyirdik. Amma "İnter"lə müqavilə bağladınız...
- Altı aylıq müqavilə bağladım. "İnter"ə Avropa Liqasında görə keçdim. Komandaya bu turnirdə kömək etməyə çalışacağam. Amma belə razılığa gəlmişik ki, hansısa klubdan sərfəli təklif alsam, "İnter"i problemsiz tərk edə biləcəyəm.
- Altı ay sonra, ya indi?
- İndi. Təklif gəlsə, istənilən vaxt klubdan ayrılmağım mümkündür.
- Deməli, siz komandaya ancaq Avroliqada kömək edəcəksiniz?
- Vaxt keçir, mənimlə maraqlanan digər klublar isə konkret təklif irəli sürmürdülər. Avropa Liqası da başlamaq üzrədir, "İnter" artıq bu turnirə hazırlaşır. Ona görə də bu kluba keçməyə qərar verdim.
- Maliyyə şərtləri necədir?
- Mən "İnter"ə yalnız kömək etmək üçün gəlmişəm. Çünki oynamaq istəyirəm. Mənim üçün əsas olan budur.
- Sizin "Kəpəz", "Zirə" və "Qəbələ" ilə də danışıq apardığınız bildirilirdi. "İnter"dən başqa hansısa yerli klub sizə təklif göndərmişdi?
- Bəli, təkliflər var idi. Amma "İnter" mənə daha yaxın olduğu üçün bu klubu seçdim.
- Zaur Svanadze ilə görüşünüz olub?
- Elə də çox söhbət etməyə imkanımız olmayıb. Sadəcə, görüşdük, danışdıq, o, mənə uğur arzuladı.
- "İnter"də hazırda iki taran tipli hücumçu var - siz və Yuri Fomenko. Siz birgə çıxış edəcəksiniz, ya daha hazırlıq olan meydana çıxacaq?
- Düzünü deyim ki, bunu bilmirəm. Bu barədə qərarı baş məşqçi verəcək.
- "İnter"dən hansı nəticəni gözləmək olar?
- Fikrimcə, indiki vəziyyətdə klub rəhbərliyi Avropa Liqasında çox böyük iddia nümayiş etdirməyəcək. Klubdakı durum hər kəsə bəllidir.
