Vaqif Cavadov: XL ilə iki illik müqavilə bağlamağım düzgün informasiya deyil
"Xəzər Lənkəran"ın yeni transferi Vaqif Cavadovun azerisport.az saytına müsahibəsi
- "Xəzər Lənkəran"a keçidiniz necə alındı?
- Hər şey çox gözlənilməz alındı. Amma bu klubdan dəvət almaq xoş oldu. Onlar mənimlə çoxdan maraqlanırdılar. Lakin hər dəfə razılığa gələ bilmirdik. Bu dəfə isə alındı. Hamı da razı qaldı.
- Əvvəllər XL daha böyük büdcəyə malik idi. Əgər əvvəllər sizi razı sala bilmirdilərsə, indi necə razı saldılar?
- Deməzdim ki, indi onların büdcələri aşağıdır. Hamı "Xəzər Lənkəran"ın nəyə qadir olduğunu yaxşı bilir. Bu baxımdan problem olmadı.
- İki illik müqavilə imzalamısınız və az müddət deyil. Lənkəranda möhkəmlənməyi düşünürsünüz?
- Bu, düzgün informasiya deyil. Mən bir illik müqavilə imzalamışam.
- Yeni klubunuzdan növbəti mövsümdə nə gözləyə bilərik?
- Klubun həyata keçirdiyi transferlər çox şeydən xəbər verir. Şübhəsiz ki, iddialı olacağıq. XL həmişə çempionluğa oynayıb. Düşünmürəm ki, yeni mövsümdə qarşımıza başqa bir hədəf qoyulsun. Biz yaxşı heyətlə Premyer Liqanın digər favoritlərinə qarşı layiqli müqavimət göstərə biləcəyik.
- Başqa variantlar var idi?
- Düzünü desəm, olsa da, konkret təklif deyildi.
- "Boluspor"da niyə möhkəmlənə bilmədiniz?
- Heç kim heç nə başa düşmədi. Məni bu komandaya baş məşqçi özü gətirmişdi, amma mənə şans vermədi. Buna baxmayaraq, klub rəhbərliyi mənə yeni müqavilə təklif etmişdi. Bunu hətta klubun özündən də dəqiqləşdirə bilərsiniz. Klub rəhbərliyi məndən razı qalmışdı.
- Bəs niyə qalmadınız?
- Vətənə qayıtmağımı şərtləndirən səbəblər var idi.
- Bəlkə siz vətənə qayıtmaqla həm də sizi yığmanın son oyunlarına çağırmayan Robert Prosineçkinin gözü önündə olmağa hədəfləmisiniz?
- Xeyr, bu, mənim qayıtmağımın əsas səbəbi deyil. Bu, ilə məsələləri ilə bağlıdır. Amma şübhəsiz ki, vətənə qayıtmaqla Prosineçkinin də gözü önündə olacağam.
- Yığmadan kənarda qalmaq üzücü olmadı?
- Normal qəbul etdim. Onadək problemlərim var idi, ona görə çağırılmadım. Oynasam, yenə dəvət alacağam.
