Vidadi Rzayev: Əminəm ki, Avropa klubları arasında Qarabağa rəqib olmaq istəməyənlər də var
Veteran futbolçu Vidadi Rzayevin azerisport.az saytına müsahibəsi
- Qarşıda klublarımızı avrokubokların püşkatması gözləyir. Sizcə, püşk "Qarabağ"ın üzünə güləcək?
- "Qarabağ"ın reytinqini nəzərə alsaq, ÇL-in ikinci təsnifat mərhələsində elə də güclü rəqib gözləməyə dəyməz. Düzdür, istənilən halda ağdamlıları hansısa Avropa ölkəsinin çempionu ilə görüş gözləyir. Amma məncə, bu mərhələdə istənilən rəqib "Qarabağ"ın dişinə görə olacaq. Hətta əminəm ki, ÇL-in bəzi iştirakçıları komandamızla düşməməyi düşünürlər.
- Azərbaycan çempionundan bu mövsüm nə gözləyirsiniz?
- ÇL-in qrup mərhələsinə düşmələrinə ümid edirəm. Amma bu, çətin olacaq. Ən pis halda Avropa Liqasının qrup mərhələsinə düşməlidirlər. Yeni mövsümdə Avroliqanın pley-offuna qədər irəliləmək olar.
- Avroliqadakı təmsilçilərimiz arasında ən aşağı reytinqə malik olan "Qəbələ"dir ki, onlara da "Vest Hem", "Rusenborq", "Bröndbü", "Srvena Zvezda" kimi güclü komandalar düşə bilər...
- Ümid edirəm ki, qeyd etdiyiniz komandalardan heç biri ilə düşmərik. Çünki "Qəbələ"nin potensial rəqibləri arasında da Malta, Lüksemburq, Lixtenşteyn kimi ölkə təmsilçiləri var. Onları gözləyəcəyəm (gülür).
- Bəs bəxtimiz gətirməsə?
- Oynamaq lazımdır. "Qəbələ" bu mövsüm sözünü deməlidir. Vaxtilə "Qarabağ" da "Rusenborq" kimi komandaları mübarizədən kənarlaşdırmaqla indiki reytinqi qazanıb.
- "Neftçi" və "İnter"dən nə gözləyirsiniz?
- Onların ilk rəqibləri keçiləsi komandalar olacaq. Amma onların bu oyunlara hansı dərəcədə hazır olmasından çox şey asılı olacaq. Çətinliklərə baxmayaraq, hər iki komandamız birinci mərhələni keçə bilər. Azərbaycan yığması da son oyunlarda müsbət nəticələr qazana bildi. Bu, klublarımızda da inam yaratmalıdır.
- Sizcə, yığmanın Malta üzərində qələbəsi, Norveçlə səfər heç-heçəsi futbolçularda inam yaradıb?
- Bəli, belə oyunlar öz təsirini göstərməlidir. Futbolçu üçün özünəinam böyük amildir. Çünki yığmamız Norveçə hətta qalib də gələ bilərdi.
