Nika Kvekveskiri: İnterin maliyyə problemi mənim işim deyil

"İnter"in yeni transferi Nika Kvekveskirinin azerisport.az saytına müsahibəsi

- Paytaxt klubuna keçidinizlə bağlı nə deyə bilərsiniz?
- Şadam ki, "İnter" kimi bir klubla müqavilə imzaladım. Fikrimcə, düzgün qərar qəbul etmişəm.

- "İnter" barədə nə bilirsiniz?
- Bilirəm ki, bu komanda daim çempionluğa oynayır. Həmçinin bu komandada çoxlu gürcü futbolçunun çıxış etməsindən də xəbərim var.

- Zaur Svanadze ilə söhbətiniz olub?
- Şadam ki, Svanadze kimi bir mütəxəssislə çalışacağam. O, doğrudan da yüksək səviyyəli bir məşqçidir.

- "İnter"ə keçidinizə nə səbəb oldu?
- Legioner həyatı yaşamaq istəyirdim. Ümid edirəm ki, komandama faydalı olacağam.

- "İnter"də məşqlərə nə vaxt başlayacaqsınız?
- Artıq komandanın məşqlərinə qatılmağa başlamışam.

- Yəqin ki, seçiminizə komandanın paytaxtı təmsil etməsi də təsir etdi?
- Bakı çox xoşuma gəldi. Doğrudan da gözəl şəhərdir.

- Müqavilənin müddəti nə qədərdir?
- Bir il.

- Komandaya uyğunlaşmaq baxımından problem yoxdur?
- "İnter"də gürcülər var. Amma komandada elə oyunçular var ki, hətta gürücülər olmasaydı da, mənim bura uyğunlaşmağım problem olmayacaqdı. Digər tərəfdən Georgi Lomaya, Zaur Svanadze kimi peşəkarlarla birgə çalışmaq çox xoşdur.

- Siz "İnter"ə gələrkən klubun maliyyə probleminin olduğunu bilirdiniz?
- Bu, mənim işim deyil. Bu barədə danışmaq istəmirəm. Bircə onu deyə bilərəm ki, hər şey yaxşı olacaq.