Bədavi Hüseynov: Qurban Qurbanov onlara layiqli əvəzləyici tapacaq

Azərbaycan yığmasının və "Qarabağ"ın müdafiəçisi Bədavi Hüseynovun azerisport.az saytına müsahibəsi

- Türkiyənin "Trabzonspor" klubunun sizinlə maraqlandığı bildirilirdi. Konkret nəsə var?
- Bəli, elə söhbətlər var idi. Amma "Trabzonspor"dan mənə rəsmi təklif gəlməyib. Türkiyə klubu belə bir təklif göndərsəydi, "Qarabağ" rəhbərliyi mənə xəbər verərdi.

- "Qarabağ"ın yeni transferi Alharbi El-Jadeyui barədə məlumatınız var?
- Düzünü desəm, hələ komandaya kimlərin gəldiyini bilmirəm. Avstriya toplanışına qədər daha çox ailəmlə birgə olmağa çalışdım. Çünki çoxdan idi görüşmürdük.

- Sizcə, klubunuz Leroy Corca layiqli əvəzləyici tapa biləcək?
- Qurban Qurbanov kimisə komandaya gətirməyə qərar verirsə, deməli, həmin futbolçu bizə fayda verəcək.

- Vüqar Nadirov, Muarem Muarem və Leroy Corcun gedişi komanda üçün nə dərəcədə böyük itkidir?
- Təbii ki, hər hansı futbolçunun getməsi komanda üçün bir itkidir. Çünki onlar əsas heyətin üzvləriydilər. Amma məncə, baş məşqçimiz onlara layiqli əvəzləyici tapacaq. Sadəcə, bizə bir qədər zaman lazımdır. Allah eləsin ki, hər şey yaxşı olsun və növbəti mövsümdə də qızıl medallar uğrunda mübarizə aparaq.

- Azərbaycan yığması ilə AÇ-2016-nın seçmə mərhələsində Norveçə qarşı qolsuz heç-heçə barədə nə deyə bilərsiniz?
- Bizim üçün asan oyun olmadı. Norveçlilər fiziki baxımından bir qədər güclüdürlər. Amma biz bu görüşdə kompakt oynamağa çalışdıq və nəticə qazandıq.

- Robert Prosineçkinin rəhbərliyi altında komanda ikinci rəsmi oyununda da müsbət nəticə qazanmağı bacardı. Onun gəlişindən sonra komandamızda müsbət dəyişikliklərin olduğunu demək olar?
- Baş məşqçinin bizdən nə istədiyini başa düşürük və çalışırıq ki, onun bütün tapşırıqlarını meydanda həyata keçirək. Amma üzərində işləməli olduğumuz çox şey var. Çünki qarşıda komandamızı daha çətin görüşlər gözləyir.