Tahir Süleymanov: Futbolçu ilə elə vidalaşmaq lazımdır ki, sonra belə olaylar yaşanmasın
"Neftçi"nin sabiq vitse-prezidenti Tahir Süleymanovun azerisport.az saytına müsahibəsi
- "Neftçi"nin Emil Mpenza ilə bağlı məlum aqibətlə üzləşəcəyini gözləyirdiniz?
- 2012-ci ildə Türkiyədə Drezden "Dinamo"su ilə oyundan sonra o, məşqə çıxmaqdan imtina etdi. Biz ona dedik ki, "Neftçi"də oynamaq istəmirsənsə, özünə klub tapa bilərsən. Bütün sənədlər də əlimizdədir. Lazım olsa, onları ictimaiyyətə açıqlaya da bilərik. Biz ona yazılı şəkildə müraciət ünvanladıq, onu Belçika Futbol Federasiyasına və FİFA-ya da göndərdik. Buna baxmayaraq, o, kluba qayıtmaq istəmədi. Bizim FİFA-ya şikayətimiz də bəhrəsiz qaldı. FİFA sadəcə, kimin haqlı olduğunu müəyyənləşdirə bilmədi. Bu üzdən də heç bir qərar qəbul edilmədi.
- Amma indi məlum olur ki, FİFA Mpenzanı haqlı çıxarıb və "Neftçi" ona böyük məbləğdə pul ödəməlidir...
- Ötən gün məni "Neftçi"nin Müşahidə Şurasının iclasına dəvət etmişdilər. Maraqlı diskussiya alındı. Danışıqların yekununda İdman Arbitraj Məhkəməsinə (CAS) müraciətə qərar verildi. Bizim haqlı olduğumuzu sübut edəcək kifayət qədər sənədimiz, dəlilimiz var. FİFA hazırda Zepp Blatterin istefası, rüşvət qalmaqalı ilə bağlı öz problemlərinin həlli ilə məşğuldur. Bu üzdən onların istənilən qərarı yekun kimi sayılmamalıdır.
- İstisna deyil ki, Julius Vobay və Ernest Nfor da klubdan şikayətçi olsun...
- FİFA adətən futbolçuları prioritet hesab edir. Messi ilə Ronaldodan tutmuş bizim futbolçulara qədər hamısının hüquqları bu qurum tərəfindən qorunur. Çünki meydana çıxan, azarkeşləri stadiona gətirən futbolçulardır. Futbolçu ilə də elə vidalaşmaq lazımdır ki, belə hadisələr baş verməsin. Amma bu əksər klubların başına gəlir. Hətta "Barselona" da sanksiya ilə üzləşib. Vobayla müqavilənin müddəti başa çatıb. Amma əminəm ki, klub ona olan borcu tam ödəyəcək.
- "Neftçi"nin yeni rəhbərliyi gənclərə üstünlük verir. Sizcə, bu, nə dərəcədə doğru qərardır?
- "Neftçi" Azərbaycanın "Barselona"sı, "Real"ı, "Mançester Yunayted"i, "Bavariya"ı, "Qalatasaray"ı, "Fənərbaxça"sıdır. İstənilən layihəyə başlamaq olar. Hətta meydana 17 yaşlı futbolçu da buraxa bilər. Amma istənilən halda klub Azərbaycan futboluna fayda verməlidir. Tutaq ki, "Barselona" yeni layihəyə başlayır, gənclərə şans verir, öz iddialarından əl çəkir. Bunu təsəvvür edə bilirsiniz? Gedenin dövründə mənasız siyasət yürüdən "Neftçi"ni biz yeni səviyyəyə qaldırdıq. İndi yeni rəhbərlik həmin uğurların davamını gətirməlidir. Bizim dövrümüzdə də gənclər oynayırdı. Amma eyni zamanda ölkəmizi Avropa Liqasında layiqincə təmsil edirdik.
- Sizcə, Samir Əliyevin komandası nə dərəcədə uğurlu olacaq?
- Komandaya kompleks şəkildə qiymət vermək lazımdır. Klubun beynəlxalq arenada uğurlu çıxış etmək üçün kifayət qədər təcrübəsi var. "Neftçi"nin kifayət qədər yüksək reytinqi var. "Qəbələ"nin baş məşqçisi Roman Qriqorçuk əbəs yerə komandasının reytinqinin aşağı olmasından gileylənmir. Bu reytinqi itirməmək lazımdır. Çünki sonra həmin reytinqi geri qaytarmaq çətin olacaq.
