Şahin Diniyev: Fiziki baxımdan güclü olan rəqibə qarşı oynamaq çətin idi

Avropa çempionatının seçmə qrup mərhələsi çərçivəsində Farer adaları ilə qarşılaşan 21 yaşadək futbolçulardan ibarət komandamız 1:0 hesabı ilə qələbə qazanıb. Danimarkada təşkil edilən təlim-məşq toplanışında, eləcə də rəsmi oyunda U-21-in yanında olan AFFA-nın Məşqçilər Komitəsinin üzvü Şahin Diniyev azerisport.az saytına açıqlamasında fikirlərini bölüşüb:

“İyunun 10-dan komandanın düşərgəsindəyəm. Komandanın məşq proseslərində yaxından iştirak edirdim. Yaxşı bir əhval-ruhiyyə ilə başladıq. Ağır oyun oldu. Farer adalarında həm dağlıq şəraitdə, həm süni örtükdə, eləcə də atletik və fiziki baxımdan güclü olan rəqibə qarşı yaxşı oynamaq çətin idi. Rəqib atletik baxımdan bizdən qat-qat üstün idi. Mübarizələrdə çətinlik çəkirdik. Bununla belə, komandamız əsl xarakter göstərdi, “döyüşdü”, ağır da olsa, qələbə qazandı. Seçmə mərhələyə qələbə ilə start vermək komandada yaxşı motivasiya yaradacaq.

Ümumiyyətlə U-21-in heyətində perspektiv vəd edən, gələcəyimizi təmin edən yetərincə futbolçu var. Sadəcə, onlar üzərlərində çox işləməlidirlər. Bu gün yığmamız komanda şəklində mübarizə aparrdı, nəyə qadir olduğunu göstərdi. Qazanılan 3 xal münasibəti ilə U-21-in məşqçi heyətini və futbolçuları təbrik edirəm”.